Ərdoğandan Talibanla bağlı açıqlama: “Talibanı əhatəli bir hökumət qurmağa yönəltməliyik”

dunya
12 okt 2021
18:23

Ərdoğandan Talibanla bağlı açıqlama: “Talibanı əhatəli bir hökumət qurmağa yönəltməliyik”

"3,6 milyonu Suriyadan olan 5 milyon qaçqına ev sahibliyi edən ölkəmiz Əfqanıstandan qaynaqlanan yeni bir köç yükünü daşıya bilməz”.

Bunu Türkiyə prezidenti Rəcəb Tayyib Ərdoğan deyib. Ərdoğan Əfqanıstan xalqına yardım etməyin zəruri olduğunu bildirib:

"G20 -ni dünyamızın qarşılaşdığı çətinliklər qarşısında əməkdaşlıq üçün əsas platforma olaraq görürəm. Əfqanıstandakı proseslərin siyasi və humanitar ölçüləri ilə bərabər iqtisadi və maliyyə təsirləri də var. Məsələnin G20-nin iş sahəsi çərçivəsində nəzərdən keçirilməsini alqışlayıram. Əfqanıstanda yeni bir siyasi reallıqla üz-üzəyik. Ölkədə təhlükəsizlik və sabitliyin təmin edilməsi beynəlxalq miqyasda da çox vacibdir.

Dialoq kanallarını açıq saxlamalı və Talibanı əhatəli bir hökumət qurmağa yönəltməliyik. Bu gün Əfqanıstan xalqı 40 ildən çox davam edən münaqişə və terrorun, siyasi qeyri-müəyyənliyin dağıdıcı nəticələri ilə mübarizə aparır. Belə bir dövrdə beynəlxalq toplumun Əfqanıstan xalqına arxa çevirmək kimi şansı yoxdur. Bu çətin günlərdə Əfqanıstan xalqı qarşısında qardaşlıq borcumuzu yerinə yetirməyə davam edəcəyik”.

Dövlət başçısı Əfqanıstandan olan immiqrasiyanın Avropaya da təsir edəcəyini deyib:

"İŞİD-in Kabil Hava Limanında həyata keçirdiyi hücumlardan göründüyü kimi, terror təhlükəsi hələ də davam edir. Məlumdur ki, Əfqanıstanda baş verənlər immiqrasiya riskini artırır. 3,6 milyonu Suriyadan olan 5 milyon qaçqına ev sahibliyi edən ölkəmiz Əfqanıstandan qaynaqlanan yeni bir köç yükünü daşıya bilməz. Türkiyənin cənub və şərq sərhədlərindən məruz qalacağı immiqrasiya təzyiqindən Avropa ölkələrinin də təsirlənməsi qaçılmazdır”.