14 oktyabr 2026-cı ildə Bakının mərkəzində Azərbaycan qadınının zərifliyini və xalqımızın zəngin mədəni irsini özündə yaşadan kəlağayının təbliğinə həsr olunmuş yürüş keçirilib.

QHT-lərin təşkilatçılığı ilə baş tutan tədbirdə milli geyimlərdə olan xanımlar bir araya gələrək qədim milli ənənələrimizə və mənəvi dəyərlərimizə bağlılıqlarını nümayiş etdiriblər.

İçərişəhərdən, Qız Qalasının ətrafından başlayan yürüş Fəvvarələr Meydanı istiqamətində davam edib və Dənizkənarı Milli Parkda başa çatıb. İştirakçılar rəngarəng kəlağayıları, milli geyimləri və ifa etdikləri mahnılarla paytaxt sakinlərinin, eləcə də xarici qonaqların diqqətini cəlb ediblər.

KƏLAĞAYI — MİLLİ KİMLİYİMİZİN VƏ QADIN ZƏRİFLİYİNİN RƏMZİ

Kəlağayı Azərbaycan qadınının geyim mədəniyyətində xüsusi yer tutan, nəsildən-nəslə ötürülən qiymətli milli irs nümunəsidir. İpəyin zərifliyi, naxışların özünəməxsusluğu və rənglərin ahəngi bu sənət əsərini xalqımızın mədəni yaddaşının ayrılmaz hissəsinə çevirib.

Yürüşün əsas məqsədlərindən biri milli geyimlərə, xüsusilə kəlağayıya marağı artırmaq, bu ənənəni gənc nəslə tanıtmaq və gələcək nəsillərə ötürülməsinə töhfə verməkdir. Tədbirdə iştirak edən vətəndaş cəmiyyəti nümayəndələri milli dəyərlərin qorunmasının vacibliyini vurğulayıblar.

Kəlağayının beynəlxalq səviyyədə tanınması da onun mədəni əhəmiyyətini təsdiqləyir. 2014-cü ilin noyabrında kəlağayının ənənəvi hazırlanması, daşınması mədəniyyəti və simvolikası UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilib.

Milli irsə sahib çıxmaq yalnız keçmişimizi xatırlamaq deyil, həm də gələcəyimizi qorumaqdır. Çünki hər bir milli dəyər xalqın tarixini, yaddaşını və kimliyini yaşadır.

Bakıda keçirilən kəlağayı yürüşü bir daha göstərib ki, milli ənənələrimizin yaşadılması və təbliği cəmiyyətin mədəni həyatında mühüm yer tutur.

Kəlağayımız yaşasın, milli dəyərlərimiz qorunsun, Azərbaycan mədəniyyəti gələcək nəsillərə qürurla ötürülsün!


ATA-TV.az

Aynurə Ulduz (Teymurova)