Azərbaycanın media tarixində xüsusi yeri olan “Azərbaycan” Nəşriyyatının doqquzmərtəbəli əsas korpusu əsaslı təmirə görə 1 fevral 2026-cı il tarixindən fəaliyyətini dayandırıb. Lakin bu qərar təkcə bir binanın təmiri məsələsi deyil. Burada illərdir fəaliyyət göstərən qəzet, jurnal və digər media redaksiyalarının gələcək talehi də ciddi suallar doğurur.

Açıq mənbələrdə yayılan məlumatlara əsasən, “Azərbaycan” Nəşriyyatı 1974-cü ildən fəaliyyət göstərib.Uzun illərdir ki, adıçəkilən bina Azərbaycan mətbuatının inkişafına töhfə verib, ölkə mətbuatının beynəlxalq səviyyədə tanınmasında mühüm rol oynayıb. Lakin binada yaranmış təmir zərurəti ilə əlaqədar fəaliyyət müvəqqəti olaraq dayandırılıb.

Məsələnin narahatedici tərəfi də məhz budur: redaksiyalar hara köçdü, hansı şəraitdə fəaliyyətini davam etdirir və onların gələcək fəaliyyəti üçün hansı təminatlar mövcuddur?

JURNALİSTLƏRİN İQTİSADİ İMKANLARI DA NƏZƏRƏ ALINMALIDIR

Bu gün bütün media qurumlarının böyük maliyyə imkanlarına malik olduğunu söyləmək mümkün deyil. Xüsusilə öz vəsaiti hesabına fəaliyyət göstərən, reklam gəlirləri məhdud olan qəzet və saytlar üçün yeni ofis icarəyə götürmək əlavə maliyyə yüküdür.

Ayrı-ayrı ünvanlarda ofis kirayələmək, kommunal xərcləri ödəmək və redaksiyanın gündəlik fəaliyyətini təmin etmək onsuz da çətin iqtisadi şəraitdə çalışan media qurumlarının imkanlarını daha da məhdudlaşdıra bilər.

Bəs bu vəziyyətdə jurnalistlərin ortaq məkanda fəaliyyət göstərməsi üçün niyə alternativ həll yolu müzakirə olunmasın?

Əgər “Azərbaycan” Nəşriyyatının əsas korpusu təmirə bağlanıbsa, redaksiyaların müvəqqəti olaraq başqa bir binada yerləşdirilməsi, onlara münasib qiymətlərlə ofis sahələrinin ayrılması mümkün deyilmi?

JURNALİSTLƏRİN ORTAQ MƏKANI OLMAMALIDIR.

Jurnalistlər dövlətin və xalqın informasiya məkanında mühüm rol oynayırlar. Onlar cəmiyyəti məlumatlandırır, ictimai problemləri işıqlandırır, vətəndaşların səsini aidiyyəti qurumlara çatdırırlar.

Əlbəttə, jurnalistlərin fəaliyyəti ilə bağlı məsuliyyət və öhdəliklər olduğu kimi, onların normal iş şəraitinə dair məsələlər də diqqətdən kənarda qalmamalıdır.

Burada söhbət bütün redaksiyaların mütləq şəkildə dövlət hesabına saxlanılmasından getmir. Söhbət real ehtiyacın qiymətləndirilməsindən, iqtisadi çətinliklərin nəzərə alınmasından və media qurumları üçün əlçatan iş şəraitinin yaradılmasından gedir.

Məsələn, redaksiyaların fəaliyyətinə uyğunlaşdırılmış, müasir texniki imkanlarla təchiz edilmiş və münasib icarə şərtləri təklif olunan ortaq media binası yaradılması bir çıxış yolu ola bilər. Belə bir məkanda qəzet və sayt redaksiyaları ilə yanaşı, kiçik müstəqil media qurumları üçün də ofislər nəzərdə tutula bilər.

Mətbuatın inkişafı yalnız yeni informasiya vasitələrinin yaradılması ilə ölçülmür. Mövcud redaksiyaların yaşaması, jurnalistlərin fəaliyyətini davam etdirməsi və ictimaiyyətə xidmət göstərməsi üçün şəraitin qorunması da mühüm əhəmiyyət daşıyır.

Jurnalistlər ayrı-ayrı ünvanlara səpələnərək iqtisadi çətinliklərlə mübarizə apaırlar.
SON OLARAQ, ümid edirik ki, “Azərbaycan” Nəşriyyatı binasında yaranmış çətinliklər tezliklə aradan qaldırılacaq və təmir başa çatanadək redaksiyaların, ofislərin və jurnalistlərin müvəqqəti olaraq uyğun bir məkana köçürülməsi təmin olunacaq.
Ümid edirik ki, aidiyyəti qurumlar fikirlərimizi və jurnalistlərin narahatlığını nəzərə alacaqlar.
QEYD: Bu məqalə daxil olan sorğular əsasında hazırlanıb.

AYNURƏ ULDUZ TEYMUROVA