Dövlətçilik, milli maraqlar və ictimai məsuliyyət diqqət mərkəzində 22 oktyabr tarixində Sumqayıtda Yeni Azərbaycan Partiyasının (YAP) VIII Qurultayında Prezident İlham Əliyevin çıxışından irəli gələn vəzifələrə həsr olunmuş müşavirə keçirilib. Tədbirdə Sumqayıt Şəhər İcra Hakimiyyətinin başçısı Zakir Fərəcovun da iştirakı diqqət çəkib.

Belə tədbirlər yalnız qarşıya qoyulan vəzifələrin müzakirəsi ilə məhdudlaşmamalı, eyni zamanda həmin vəzifələrin real həyatda necə həyata keçiriləcəyinə dair konkret yanaşmaların formalaşmasına xidmət etməlidir.

Müasir dövrdə dövlətçilik prinsiplərinin qorunması, milli maraqların müdafiəsi, sosial-iqtisadi inkişafın davamlılığı və cəmiyyətlə dövlət qurumları arasında etimadın möhkəmləndirilməsi xüsusi əhəmiyyət daşıyır. Bu baxımdan, qurultayda səsləndirilən fikirlərin yerli səviyyədə əməli fəaliyyətə çevrilməsi mühüm məsələdir.

Sumqayıt Azərbaycanın sənaye potensialı, iqtisadi inkişafı və əhalisinin fəallığı ilə seçilən şəhərlərindən biridir. Şəhərin gələcək inkişafı isə yalnız rəsmi tədbirlərlə deyil, sakinlərin gündəlik həyatında hiss olunan müsbət dəyişikliklərlə ölçülür.

Vətəndaş müraciətlərinə həssas yanaşma, sosial problemlərin həlli, şəhər infrastrukturunun yaxşılaşdırılması, şəffaflığın təmin edilməsi və ictimai nəzarətə açıq münasibət dövlət idarəçiliyinin mühüm göstəricilərindəndir.

Rəsmi müşavirələrdə səsləndirilən çağırışların əhəmiyyəti də məhz onların praktik nəticələrində özünü göstərir. Qarşıya qoyulan vəzifələrin icrası zamanı vətəndaş məmnunluğunun, sosial ədalətin və ictimai maraqların əsas götürülməsi xüsusi önəm daşıyır.
Nəticə etibarilə, dövlətçilik ideyalarına sadiqlik yalnız bəyanatlarla deyil, məsuliyyətli fəaliyyət, şəffaf idarəçilik və xalqın etimadını doğruldan konkret addımlarla təsdiqini tapmalıdır.

Aynurə Ulduz Teymurova
ATA-TV.az, AZAD- TV.az baş redaktorunun birinci müavini