Azərbaycanın müasir tarixində elə günlər, elə sınaqlar olub ki, həmin anlarda xalqın iradəsi, dövlətin gücü və milli birliyimiz hər şeydən üstün tutulub. Belə məqamlarda dövlət rəhbərinin məsuliyyəti, qəbul etdiyi qərarlar və ölkənin gələcəyinə dair mövqeyi xüsusi əhəmiyyət daşıyır.
Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi altında qazanılan tarixi Zəfər xalqımızın yaddaşına qızıl hərflərlə yazılıb. Bu Qələbə Azərbaycan xalqının iradəsinin, əsgər və zabitlərimizin qəhrəmanlığının, şəhidlərimizin müqəddəs fədakarlığının və dövlətimizin gücünün təcəssümüdür. Bu tarixin ən böyük qəhrəmanları canlarını Vətən uğrunda fəda edən şəhidlərimiz, sağlamlıqlarını itirən qazilərimiz və torpaqlarımızın azadlığı uğrunda döyüşən hərbçilərimizdir.
Mən bir Azərbaycan vətəndaşı, jurnalist və publisist kimi hesab edirəm ki, çətin sınaqlardan keçmiş xalqımızın qazandığı nailiyyətləri qorumaq, dövlətimizin sabitliyinə, müstəqilliyinə və milli birliyinə sahib çıxmaq hər birimizin məsuliyyətidir.
Bu gün informasiya məkanında yayılan hər bir məlumatı diqqətlə qiymətləndirmək, əsassız iddialara inanmamaq, təsdiqlənməmiş xəbərləri paylaşmamaq xüsusilə vacibdir. Cəmiyyətdə qarşıdurma yaratmağa, vətəndaşları bir-birinə qarşı qoymağa və dövlət institutlarına inamı sarsıtmağa yönələn mümkün təxribatlara qarşı ayıq-sayıq olmalıyıq. Hər hansı iddia rəsmi və etibarlı mənbələrdən təsdiqlənmədən həqiqət kimi təqdim edilməməlidir.
DÖVLƏTİMİZİN GÜCÜ XALQIMIZIN BİRLİYİNDƏDİR!
Bir media nümayəndəsi olaraq mənim mövqeyim aydındır: jurnalistikanın vəzifəsi cəmiyyəti qorxuya salmaq deyil, insanları məlumatlandırmaq; nifaq yaratmaq deyil, həqiqəti üzə çıxarmaq; təxribatı yaymaq deyil, faktları araşdırmaqdır.
Biz sözümüzlə, qələmimizlə və ictimai mövqeyimizlə Vətənimizin maraqlarını qorumalı, xalqımız arasında həmrəyliyi gücləndirməliyik. Fərqli fikirlərimiz ola bilər, problemləri açıq şəkildə müzakirə edə bilərik. Lakin heç bir fikir ayrılığı Azərbaycanın müstəqilliyindən, suverenliyindən və xalqımızın gələcəyindən üstün deyil.
Vətənini sevən insan ölkəsində sülhün, sabitliyin və ədalətin qorunmasını istəyər. Dövlətini sevən jurnalist isə yalnız təriflə kifayətlənməz; həqiqəti, qanunçuluğu, məsuliyyəti və milli maraqları əsas götürər.
Cənab Prezident İlham Əliyevin rəhbərliyi altında əldə edilmiş tarixi nailiyyətləri, şəhidlərimizin əmanətini və xalqımızın birliyini qorumaq hamımızın ortaq məsuliyyətidir. Heç bir təxribat bizi bir-birimizə düşmən etməməli, heç bir əsassız məlumat milli həmrəyliyimizi sarsıtmamalıdır.
Gəlin, Vətənimizin ətrafında birləşək, dövlətimizin müstəqilliyini qoruyaq, təxribatlara uymayaq və gələcək nəsillərə güclü, sabit, suveren Azərbaycan miras qoyaq!

ALLAH AZƏRBAYCANIMIZI QORUSUN!
ŞƏHİDLƏRİMİZİN RUHU ŞAD OLSUN!
QARABAĞ AZƏRBAYCANDIR!

AYNURƏ ULDUZ TEYMUROVA ATA-TV.az — baş redaktorun I müavini AZAD-TV.az — direktoru “Qızıl Qələm” media mükafatı laureatı