XOCASƏN QƏSƏBƏSİNDƏ DAYANACAQ PROBLEMİ: SAKİNLƏR AİDİYYƏTİ QURUMLARDAN REAKSİYA GÖZLƏYİR!

ATA TV MƏSƏLƏNİ DƏRİNDƏN ARAŞDIRDI!

Bu gün ATA TV çəkiliş heyəti Xocasən qəsəbəsində olub, sakinlərin gündəlik həyatını çətinləşdirən və illərdir həllini tapmayan ciddi problemləri yerindəcə lentə alıb.

Çəkilişin diqqət mərkəzində avtobus dayanacaqlarının xoşagəlməz vəziyyəti və sakinlərin ictimai nəqliyyatdan istifadə edərkən üzləşdikləri əziyyətlər yer alıb. Yayda istidən, qışda isə yağış və küləkdən qorunmaq üçün normal şəraiti olmayan dayanacaqlar sakinlərin səbrini daşıran əsas səbəblərdən biridir.

Çəkiliş zamanı kamera qarşısına keçən qəsəbə sakinləri gündəlik çətinliklərindən danışaraq aidiyyəti qurumlara açıq müraciət ünvanlayıblar. Onlar bildiriblər ki, məsələ təkcə dayanacaqlarla bitmir — ərazidəki yolların vəziyyəti, piyada keçidlərinin olmaması və ya qeyri-qənaətbəxş təşkili hər gün həm piyadaların, həm də sürücülərin həyatını təhlükəyə atır.

Təbii ki, dayanacaq sadəcə bir tikili deyil, vətəndaşın gündəlik həyati tələbatıdır!

Sakinlərin rahat, təhlükəsiz və sivil qaydada ictimai nəqliyyatdan istifadə etməsi təmin olunmalı, bu kimi sosial problemlər diqqətdən kənarda qalmamalıdır.

Hər zaman vətəndaşın yanında olan və onların haqlı səsini çatdıran ATA TV komandası olaraq, aidiyyəti dövlət qurumlarını Xocasən qəsəbəsindəki bu problemlərə tez bir zamanda diqqət yetirməyə və əməli tədbirlər görməyə çağırırıq!

ATA TV – Sakinlərin səsi, cəmiyyətin güzgüsü!

Rasafil Bayramov “Atatv.az” və “Azadtv.az” saytlarının baş təsisçi və redaktoru.