Yaşasaydı 66 yaşı olardı, ancaq 32 illik ömrü şərəfli, ləyaqətli yaşadı. Onun reportyorluğu jurnalistika tarixində cəsarətli və peşəkar davranış kimi qızıl hərfllərə yaddaşlara həkk olundu. Azərbaycan tarixi igid övladlarının hünəri ilə ucalıb, şəhidlərinin müqəddəs qanı ilə möhkəmlənib. Bu Vətən hər zaman azadlığı, haqqı, həqiqəti qorumaq üçün canından keçməyə hazır oğullar yetişdirib. Onlardan biri də görkəmli jurnalist və Azərbaycanın Milli Qəhrəmanı Çingiz Fuad oğlu Mustafayevdir.

O, 29 avqust 1960-cı ildə Rusiya Federasiyası Həştərxan vilayətində hərbçi ailəsində dünyaya göz açıb. Bəli, hərbçi ailəsində doğulmaq onun alın yazısı idi.

Uşaqlıq illəri Bakıda keçən qəhrəmanımız atasının istəyi ilə Cəmşid Naxçıvanski adına Hərbi Liseyə qəbul olur. Çingiz Mustafayev hərbi liseyi yarımçıq qoyaraq orta təhsilini Yasamal rayonu 167 saylı məktəbdə tamamladıqdan sonra 1983-cü ildə Azərbaycan Dövlət Tibb İnstitutunda həkim olaraq başa vurub. Amma Çingiz Mustafayevin şərəfli gələcəyi tibb ixtisası ilə bağlı deyildi. Elə bu səbəbdən qəhrəmanımızın həkim kimi fəaliyyəti uzun çəkmir. Milli təəssübkeşliyi, milli kimlik və qüruru onu jurnalistikaya gətirir.

O, həvəskar karyerasına 1990-cı ilin 20 yanvar tarixində Sovet ordusunun Bakıda mülki əhaliyə qarşı törətdiyi vəhşilikləri lentə alaraq başlayır, ancaq bu həvəs onu daha peşəkar jurnalistikaya gətirir.

Qarabağda döyüş əməliyyatları başlanan kimi Çingiz öz karyerasını tam olaraq hərbi mövzuları işıqlandıran jurnalistikaya həsr edir. O, 1991-ci ilin oktyabrından Azərbaycan Dövlət Televiziyasında reportyor kimi fəaliyyətə başlayır, ancaq dövlət televiziyasındakı qatı senzura Mustafayevin fəaliyyətini məhdudlaşdırdığından özünü burda görmür. Ona görə də Çingiz, "215 kl" studiyasını yaradaraq Azərbaycanın məruz qaldığı informasiya blokadasının aradan qaldırılmasında əhəmiyyətli addım atır.

Onun çəkdiyi reportajlar, xüsusən də cəbhə bölgəsindən gətirdiyi kadrlar Azərbaycanın informasiya mühasirəsini yararaq dünyaya çatıb. Ermənistan qüvvələrinin dinc əhaliyə qarşı qəddarlıqlarının lentə alındığı video və foto materiallar sayəsində dünya münaqişənin həqiqi xarakterini öyrənib. Çingiz Mustafayev səkkiz ay ərzində Birinci Qarabağ müharibəsi haqqında 18 sənədli film çəkib. Onun bu fəaliyyəti Ermənistanın reputasiyasını bütün dünyada ciddi sarsıdıb. Avropa, Amerika telekanallarına yol tapıb.

1992-ci il iyunun 15-də Çingiz Mustafayev ön cəbhədə, Xocalının Naxçıvanlı kəndində çəkiliş zamanı ağır yaralanıb. Vurulduğu vaxt da çəkilişdə olan kamerası qəhrəman jurnalist Çingiz Mustafayevin şəhadətini anbaan lentə alıb. Həqiqət uğrunda canından keçən jurnalist Şəhidlər xiyabanında torpağa tapşırılıb. Ölümündən sonra o, 1993-cü ildə Azərbaycanın Milli Qəhrəmanı adına layiq görülüb. Çingiz Mustafayevin adı Azərbaycan xalqının yaddaşında əbədi yaşayır və yaşayacaq. Gənc nəslin də onu tanıyıb unutmaması şərtdir.

Cəmşid Naxçıvanski adına Hərbi Liseydə büstü qoyulub. Bakının mərkəzi küçələrindən biri Milli Qəhrəman Çingiz Mustafayevin adını daşıyır. ANS ÇM radiosuna da onun adı verilib. Şahdağda 4062 metr hündürlükdə yerləşən zirvə "Çingiz zirvəsi" adlanır. 1999-cu ildən Çingiz Mustafayev adına Fond fəaliyyət göstərir. Fond "İlin adamı", "Ən yaxşı jurnalist" mükafatları və "Vətənpərvər və hərbi mahnı müsabiqəsi"ni həyata keçirib. Fondun təşəbbüsü ilə Şəkidə "Çingiz Klubu" yaradılıb. "Çingiz Mustafayev" fondu KİV işçilərinin təhsil almasına və "Çingiz Mustafayev" adına düşərgəyə yardım edib.
Çingiz Mustafayevin həyatı bizə göstərdi ki, qəhrəmanlıq təkcə silah tutmaqla deyil, həqiqəti qorumaq, informasiyanı çatdırmaqla da mümkündür. Onun bu fədakarlığı millətin azadlıq salnaməsinə qızıl hərflərlə yazıldı. Şəhid jurnalistin ruhunu doğum günündə dərin ehtiramla yad edir, cəsarəti qarşısında baş əyirik. Belə oğullara Azərbaycanın hər zaman ehtiyacı var. Həm vətənpərvər, həm savadlı, həm müstəqil, həm də cəsarətli....

ATATV.AZ saytının təsisiçisi , baş redaktor Rasafil Bayramov