İnsan Vətənini sevib, qorumalı, lazım gəldikdə onun uğrunda canından belə keçməyi bacarmalıdır. Vətənin pəhlivan kimi oğulları olmalıdır. Qəribədir ki, onun adı da Pəhlivan idi, elə şücaəti də. Pəhlivan Fərzəliyev Vətən üçün canını verən, onu düşmənlərdən qoruyaraq şəhid olan igidimiz. Uzun illər vətənə xidmət edib, əhalinin təhlükəsiziliyini təmin edən Pəhlivan sonra düşmən önündə igidcəsinə məğrur dayanıb, torpaqlarımızın işğal olunmasına göz yummayan igid oldu. O, qısa xidməti ilə qəhrəmanlıq dastanı yazmağı bacardı. Bu dastanı bütün gənclər bilməli, elə Pəhlivan kimi igid yetişməlidirlər.
Pəhlivan Fərzəliyev 27 sentyabr 1958-ci ildə Füzuli rayonunun Qobu Dilağarda kəndində doğulub böyüyüb. Oxuyub, təhsil almağı qarşısına məqsəd kimi qoymuşdur. Doğma kənddə səkkizinci sinfi başa vurduqdan sonra Şuşa Kənd Təsərrüfatı Texnikumuna daxil olur. Gələckələ bağlı böyük hədəfləri, arzuları var idi Milli Qəhrəmanımızın. Beləcə məktəbi bitirdikdən sonra 1978-ci ildə zootexnik kimi Füzuli rayonunda əmək fəaliyyətinə başlayır. Pəhlivan həm də güclü, sağlam və idmansevər gənc idi. O, texnikumda oxuduğu illərdə idmanın sərbəst güləş növü ilə məşğul olurdu. Bu məşğuliyyət zamanla ona bir sıra uğurlar qazandırmışdır.
Şuşada keçirilən çempionatda Qarabağ çempionu adını qazanaraq ailə üzvlərini və dostlarını bu xəbərə sevindirməyi də bacarır. Zaman yetişir, artıq yetkin gənc olan Pəhlivan 1979-cu ildə işlədikdən sonra ordu sıralarına çağrılan Pəhləvan Fərzəliyev əsgəri xidmətini qüsursuz yerinə yetirir. Hərbi xidmətdən tərxis olunduqdan sonra isə Qazaxıstanın Aktyubinsk şəhərinə gedir və orada daxili işlər orqanlarında işə başlayır. Ancaq işləməyinə rəğmən təhsilini düşünür, davam etdirməyi qarşısına məqsəd kimi qoyur. O, təhsilini davam etdirməyi də unutmur. Sənədlərini Orenburq Politexnik Universitetinə verir. 1986-cı ildə universitetin avtomobil nəqliyyatı fakültəsini uğurla bitirir. 4 il isə Aktyubinsk şəhər Daxili İşlər Orqanlarında uğurla çalışır. Müharibə yeni başlamışdır. Vətəndən xoş olmayan xəbərlər Pəhlivana da çatır, buna görə də çox pis olurdu. O, təsadüfü deyil ki, 1990-cı ildə baş leytenant rütbəsində Vətənə dönür. Bir az sonra onu Füzuli rayon DİŞ-də növbətçi inspektor vəzifəsinə təyin edirlər. Sonra Füzuli rayon DİŞ-də post-patrul rotası yaradılır. Qüsursuz xidmətlərinə görə o, 1991-ci ilin mart ayında rotanın 3-cü taqımına komandir təyin olunur. Yaxşı xidmətinə görə ona ikinci bir vəzifə - BTR-in ekipaj komandiri vəzifəsi də etibar edilir. Nə qədər çətin, məsuliyyətli olsa da Pəhlivan adı kimi bu işlərin öhdəsindən layiqincə gəlirdi. Füzuli rayonundakı sərhəd kəndlərinin qorunmasında o, taqımı ilə birgə mərdliklə döyüşürdü.
Həmin dövrdə hücumlara başlayan ermənilər, Füzuli rayonundakı sərhəd kəndlərini də atəşə tuturlar. Bu hücumların qarşısının alınmasında rəşadət göstərən baş leytenant bölüyü ilə birlikdə bir çox uğurlu döyüş əməliyyatında iştirak edir. Xələfşə kəndi uğrunda qəhrəmanlıq göstərən Pəhləvan Fərzəliyev bir qrup erməni yaraqlısı və bir BTR məhv edərək düşməni geri çəkilməyə məbur edir. Ancaq 1992-ci il aprel ayının 11-i tarixi Taqım komandirinin son döyüşü kimi xatırlanır. Qacar kəndi uğrunda gedən ağır döyüşlərdə baş leytenant son ana qədər qəhrəmancasına vuruşub həlak olur.
Ailəli idi. İki oğlu, bir qızı ondan Vətənə yadigar qalıb. Onlar Pəhlivanın xalqa, Azərbaycana əmanəti idi. İstər xalq olaraq bizlər, istər doğmaları həmişə ataları ilə qürur duyub, fəxr edir. Pəhlivanın keçdiyi bu cür şərəfli döyüş yolu təbii ki, diqqətdən kənarda qalmayacaqdır.
Azərbaycan Respublikası prezidentinin 8 oktyabr 1992-ci il tarixli 264 saylı fərmanı ilə baş leytenant Fərzəliyev Pəhlivan Əhliman oğluna ölümündən sonra “Azərbaycanın Milli Qəhrəmanı” adı verilməsi də bunu sübut edir. Milli Qəhrəmanımız
Füzuli rayonunun Qobu Dilağarda kəndində dəfn edilib.

Hazırda Bakı şəhərindəki qəsəbələrdən biri qəhrəmanımızı adını daşıyır.

Allah rəhmət eləsin!
ATA TV. AZ saytının xüsusi müxbiri Günel Sabirqızı