Birinci Qarabağ müharibəsində Vətənin ərazi bütövlüyü və təhlükəsizliyini hər şeydən əziz bilən və bu yolda son damla qanına qədər döyüşüb şəhidlik zirvəsinə ucalan qəhrəmanlardan biri də Azərbaycanın Milli Qəhrəmanı, şəhid Valeh Əlizaid oğlu Müslümovdur.
Yaşasaydı 58 yaşı olacaqdır,amma adı və şücaəti onu əbədi yaddaşlarda yaşadır. O, bu torpağın ,bu ölkənin ən cəsur, ən ləyaqətli oğullarından biridir ki, hər il sentyabrda onu kiçik də olsa xatirə yazısı ilə anmaq,ruhunu şad etmək jurnalist borcumuzdur.

O, 1968-ci ildə Lerik rayonunda dünyaya göz açıb. Orta təhsilini səkkizinci sinfə qədər Lerik şəhər 2 saylı məktəbdə alıb. Daha sonra Sumqayıtdakı 17 saylı peşə məktəbində dülgər ixtisasına yiyələnir. Elə bir müddət tikinti trestində də çalışmağa başlayır.

1986–1988-ci illərdə hərbi xidmətdə olan Valeh Müslümov xidmətini bitirdikdən sonra əmək fəaliyyətinə qayıdıb. Lakin Qarabağ müharibəsi başlayanda tərəddüd etmədən cəbhəyə yollanıb. 1991-ci ilin avqustundan Daxili İşlər Nazirliyinin Xüsusi Təyinatlı Milis Dəstəsi — OMON tərkibində xidmət edib.

Onun döyüş yolu Qarabağın ən qaynar nöqtələrindən — Şuşa, Xocalı, Tovuz, Füzuli, Qubadlı, Zəngilan və Ağdərə istiqamətlərindən keçib. Silahdaşları bildirirlər ki, o, hər əməliyyatda ön cəbhədə olur, “əvvəlcə döyüşçülər, sonra mən” deyə davranırdı.

Valeh Müslümov 1992-ci ilin aprelində Ağdərə istiqamətində gedən ağır döyüşlərdən birində yaralı silahdaşlarını meydanda qoymamaq üçün mövqeni tərk etməyib. Döyüş tapşırığını yerinə yetirərkən qəhrəmancasına şəhid olub. Şəhid qəhrəman doğulduğu Lerikdə torpağa tapşırılıb.

Azərbaycan Prezidentinin 6 iyun 1992-ci il, 831 nömrəli Fərmanı ilə Valeh Müslümova ölümündən sonra “Azərbaycanın Milli Qəhrəmanı” adı verilib. Lerik şəhərində bir küçə və onun təhsil aldığı 2 saylı məktəb qəhrəmanın adını daşıyır. Məktəbdə onun həyat və döyüş yolunu əks etdirən xatirə guşəsi də yaradılıb.

Ondan internetdə yadigar qalan nadir görüntülər Azərbaycan xalqına bir daha xatırladır ki, bu torpaq gənc yaşında canını Vətənə fəda edən igidlərin hesabına qorunub. Valeh Müslümovun qısa, lakin şərəfli ömür yolu yeni nəsillər üçün örnəkdir.

Allah Milli Qəhrəmanımız Valeh Müslümova rəhmət eləsin. Onun qəhrəmanlığı hər daim xalqımızın qəlbində yaşayacaq.

Gənc yaşda bu işıqlı dünyanı tərk etsə də, şərəfli bir yol keçməklə əbədi olaraq on milyonun ürəyində özünə yer etməyi bacardı. Lerik camaatı da yetişdirdiyi oğul- Valehin adı ilə fəxr edir, örnək olaraq əziz xatirəsini həmişə uca tutur, yad edirlər. Çünki onlar Vətənin ən ağır günlərində sinəsini düşmən gülləsinə sipər edib ,var gücü ilə, son damla qanına qədər vuruşublar.
Valeh Müslümov Vətən uğrunda canından keçəndə cəmi 23 yaşında olub. O, düşmənlə qeyri-bərabər döyüşdə yaralanmış 11 nəfər döyüşçü yoldaşını xilas edərək təhlükəsiz zonaya apararaq əsl qəhrəmanlıq nümunəsi göstərib. Etiraf edək ki, bu igidliyi bu yaşda bacarmaq böyük cəsarət, bacarıq istəyir. Onun igidliyinə dövlət tərəfindən yüksək qiymət verilib. Belə ki, Azərbaycan Respublikası Prezidentinin 1992-ci il 6 iyun tarixli 831 nömrəli Fərmanı ilə ilk dəfə “Azərbaycan Milli Qəhrəmanı” adını almış 11 nəfərdən biri Valeh Müslümov olub ki, o da bu ada layiqdir. Eləcə leriklilərin igid oğlu Valeh ilə bağlı dövlət tərəfindən digər işlər də görülüb. Təhsil aldığı orta məktəb onun adını daşıyır, qarşısında büstü ucaldılıb. Həmçinin şəhərin ən böyük küçəsi də ölməz qəhrəmanın adınadır.
Bəli, Vətənə sevgisi Valehi ən ali mərtəbəyə yüksəldib. İndi bütün Azərbaycan xalqı onun qəhrəmanlığı ilə qürur duyur. O, xalqımızın qəlbində daim yaşayacaq, şərəfli həyatı gələcək nəsillərə həmişə örnək olacaq.
Allah rəhmət eləsin!

Atatv.az saytının təsisçisi və baş redaktor Rasafil Bayramov