Zaman amansızdır, durmadan keçir. Dövrlər bir-birini əvəz etdikcə nəsillər də dəyişir. Lakin elə şəxsiyyətlər var ki, onların bu dünyada qoyduğu mənəvi irs zamana meydan oxuyur.

Görkəmli ziyalı, tanınmış publisist və filoloq Kamal Əlibədəl oğlu Bədəlovun yoxluğundan artıq bir əsrin dörddə biri qədər vaxt keçir. Ötən 25 il onun xatirəsini qəlblərdə zərrə qədər də azaltmayıb. Əksinə, mənəvi dünyasının işığı adına daha parlaq aydınlıq bəxş edib.

Doğma torpağa və köklərə bağlı şərəfli ömür — Parlaq ziyalı
Bu elə-belə deyilmiş sözlər deyil — mənası böyük olduğu üçün. Çünki dünyaya daha bir şərəfli ömür sahibi gəlib. Gələcək maarif fədaisi bir payız günündə dünyaya göz açanda isə, bu, onun atası Əlibədəlin, anası Xanımzadənin və qardaşı Sədirin qəlbinə sonsuz sevinc hissləri bəxş edib.

Hələ qədim Qobustan torpağının havası ilə böyüyüb, uşaqlığın daşını atarkən özünə xas xasiyyəti ilə çoxlarından fərqlənib. Zəhmətə hələ kiçik yaşlarından alışdığı göz qabağında olub. Gənclik illərində alın yazısına yetişmək üçün həyatın çətinliklər dolu neçə-neçə çətin yoxuş-enişlərindən mətanətlə keçdiyini hamı indiyədək xatırlayır.

Bütün çətinliklərin xoş təravətli bir sonluğu olur; Fikrini-zikrini hər zaman elmə verən Kamal Bədəlov o dövrün ən mötəbər elm ocağı hesab olunan Azərbaycan Dövlət Universitetinin filologiya fakültəsini bitirərək, rayonun parlaq ziyalılarından birinə çevrilib.

Fədakar maarifçiyə Ulu Öndərdən diqqət və ən böyük qiymət
Kamal müəllim hər şeydən öncə fədakar bir müəllim idi. Onun gənc nəslin savadlanması, milli-mənəvi dəyərlər ruhunda böyüməsi üçün göstərdiyi çoxillik xidmətlər dövlət tərəfindən ən ali səviyyədə qiymətləndirilib. Maarif sahəsindəki fəaliyyətinə ən böyük qiymət isə Ümummilli Lider tərəfindən verilib. Heydər Əliyev Kamal Bədəlovu şəxsən “Əməkdar pedaqoq” fəxri adı ilə təltif edib. Ulu Öndərin əlindən götürülən bu ali mükafat, onun dövlət və millət qarşısındakı xidmətlərinin unudulmaz rəmzidir.

Kamal Bədəlovun fəaliyyəti yalnız məktəb divarları ilə məhdudlaşmayıb. O, həm də sözün və mətbuatın gücü ilə cəmiyyəti irəliyə aparmağı hədəfləyən cəsur bir jurnalist idi. Şirvan mətbuatının flaqmanı olan “Yeni Şirvan” qəzetinin Baş redaktoru kimi regional medianın inkişafında silinməz izlər qoyub. Onun rəhbərliyi dövründə bu qəzet xalqın səsinə, problemlərin işıqlandırıldığı kəsərli həqiqət tribunasına çevrilib.

Prinsipiallığı, obyektivliyi və bənzərsiz publisistik üslubu ona jurnalistlərin ən ali mükafatlarından olan “Qızıl Qələm” mükafatını qazandırıb. Beləcə, Nəsimi irsinə, Sabir torpağına olan sonsuz sevgisi bu sadə insana böyük el şöhrəti gətirib.

Kamal müəllimin ən uca rütbəsi: Qayğıkeş Ata
Kamal Bədəlovun bütün rəsmi titullarının, mükafatlarının fövqündə ən böyük bir rütbəsi də olub: O, mənalı həyatı və xoş xasiyyəti ilə seçilən gözəl insan, ömür-gün yoldaşının, övladlarının və nəvələrinin əhatəsində son dərəcə qayğıkeş, fədakar bir Ata kimi yaddaşlarda qalıb.

Övladlarına təkcə savad deyil, həm də insanlığı, dürüstlüyü və xeyirxahlığı öz şəxsi nümunəsində aşılayan bir yol göstərən kimi xatirələrdə əbədiləşib.

Oğul əməllərində yaşayan Atanın xeyirxahlıq irsi — Ürəkaçan nümunələr
Bu gün Kamal müəllimin ruhunu şad edən ən böyük amil onun ocağından boy qaldıran mənəvi varislikdir. Yəni, öz xoş əməlləri ilə hər addımda atanın layiqli övladları ataya rəhmət oxutdururlar.

Məsələn, maarifçi atanın layiqli davamçısı — oğlu Elşən Bədəlov gözəl və xeyirxah atasının adını təkcə qəlbində deyil, həm də atdığı hər bir humanist addımı fövqündə yaşada bilir. Ölkənin iş adamlarından olan Elşən Bədəlov uğurlu biznes fəaliyyəti ilə yanaşı, həm də genişmiqyaslı xeyriyyəçilik əməlləri ilə yaxşı tanınır. Ehtiyacı olanlara əl tutmaq, kimsəsizlərin, şəhid və qazi ailələrinin yanında olmaq, onlara dəstək vermək onun həyat amalına çevrilib.

Elşən müəllimin etdiyi bu xeyirxahlıqlar, əslində, vaxtilə Kamal müəllimin öz övladının qəlbində əkdiyi mərhəmət toxumlarının bu gün böyük bir xeyirxahlıq çinarına çevrilməsinin bariz nümunəsidir.

Vəsiyyətə sadiqlik və əbədiyyət — Xeyirxahlıq və insanlıq missiyası
Ömrünün ahıl çağlarını Xəzər sahilində, Bakıda məğrur və sevgi dolu bir şəkildə yaşayan ustad, 75 yaşında fani dünyaya əbədi olaraq gözlərini yumdu. Lakin onun doğma torpağa bağlılığı elə bir səviyyədə idi ki, böyük maarifçi öz vəsiyyəti ilə doğma elində — Şamaxıda, ulu babalarının uyuduğu müqəddəs torpaqda dəfn olundu.

25 illik həsrət qəlbləri sızlatsa da, Kamal Bədəlovun xatirəsi silinməzdir. Bu gün Kamal müəllimin ruhu şaddır. Çünki onun adı ehtiramla anılır, qələminin izi hörmətlə xatırlanır və onun başladığı xeyirxahlıq, insanlıq missiyası oğlu Elşən Bədəlovun timsalında layiqincə davam etdirilir.

Nur içində yat, böyük ustad, fədakar Ata! Sənin müqəddəs məzarın daim nurla dolsun! İşıqlı xatirən hər zaman bizimlədir, Kamal müəllim!

NATƏVAN