Atatv.az xəbər verir ki, hadisə İmişli rayonun Hacıalmuradlı kəndində qeydə alınıb. Redaksiyamıza daxil olan məlumata görə, kənd sakini 15 yaşlı Məmmədov Leyla Niyaməddin qızı ötən ay kənd sakini 31 yaşlı Rəhimov Saməddin Eynulla oğlu ilə nişanlanıb. Kənd sakinlərinin anonim şəkildə verdiyi məlumata görə, gələn ay toy mərasiminə hazırlaşan cütlük kənddə və aidiyyəti qurumların diqqətindən nədənsə yayına bilib. Doğrusu, məsələdən xəbərdar qurumlar ailələrə təsir göstərməkdənsə susmağı seçiblər. Kənd sakinləri onu da əlavə edir ki, azyaşlı nikah yaşına çatmamasına rəğmən bu iş ailəsinin və oğlan atası Eyvazov Eynulla Abdulkərim oğlunun birgə təşəbbüsü ilə baş tutub. Belə ki, erkən nikaha məcbur edilən Məmmədov Leyla Niyaməddin qızının anasının artıq üçüncü belə qanuna zidd əməlidir. Adının çəkilməsini istəməyən şəxs bildiririr ki, ana adlı varlıq iki digər qızlarını da 14-15 yaşlarında erkən nikah qurbanı edib. Belə ki, yeniyetmə qızlarını nisbətən imkanlı ailələrin yaşca böyük övladları ilə erkən nikaha məcbur edərək uşaq evliliyini icra edib. Mənbənin ötürdüyü məlumata görə, üç qızını erkən nikaha məcbur edən ana bunu qohumluq əlaqələri quracağı qarşı tərəfin mal və qoyun vədi müqabilində icra edir. Kənddə qızın və oğlanın ailəsini hər kəs tanıdığından bu əməllərinə bələddir. Sanki çoxumuzun izlədiyi “Səriyyə” filminin senarisi yaşanıb.
Atatv.az saytı olaraq bu məlumatı müxtəlif mənbələrdən araşdırarkən məlum oldu ki, nəhayət sirrin üstü açılması nəticəsində İmişli Rayon Polis Şöbəsinin əməkdaşları bundan xəbər tutub. Polis tərəfindən oktyabr-noyabr aylarında keçirilməsi planlaşdırılan toy mərasiminin qarşısı alınıb.
DİN-in Mətbuat Xidmətinin regional qrupundan verilən məlumata görə, tərəflərin valideynləri polis şöbəsinə dəvət olunaraq onlarla profilaktik və izahedici söhbətlər aparılıb, qanunvericiliyin tələbləri izah olunub.
Qeyd edək ki, erkən nikah yaşı 18-dən az olan və ya yeniyetmələrin nikaha daxil olmasıdır. 158 ölkənin qanunvericiliyinə əsasən nikaha daxil olma yaşı kimi 18 qəbul olunsa da, bu qanunlar əksər hallarda pozulur, çünki erkən nikahların tətbiqi ənənələr və sosial normalarla dəstəklənir.
Dünyada hər gün 25 min, ildə isə 10 milyondan çox erkən nikah faktı baş verir. Hazırda erkən nikahlar daha çox Asiya və Afrika ölkələrində geniş yayılıb.
Azərbaycan Respublikasının qanunvericiliyinə görə, erkən nikah 18 yaşından kiçik oğlanların və qızların (məcburi) ailə qurması və birgə yaşamasıdır.
Ölkə üzrə ən qorxunc statisik göstərici 2007-2017-ci illərdə baş verib ki, həmin illərdə Azərbaycanda 27.847 qız nikah yaşına çatmadan evləndirilib. Hər il gizlin və qanunsuz qurulan belə yüzlərlə erkən nikah faktalarından əlavə 200-300 fakt isə aşakarlanaraq qarşısı alınır.
Qeyd edək k, erkən nikahlar həm mənəvi-psixoloji, həm də fiziki cəhətdən uşaqların gələcək həyatlarına mənfi təsir edir.
Günel Sabirqızı