Milli Qəhrəman statuslu oğullarımız, igidlərimiz Vətən uğrunda çox böyük qəhrəmanlıq yolu keçmiş şəxsiyyətlərdir. Onları zamansız anmaq , Vətənin bütövlük günlərində ruhlarını şad etmək borcumuzdur. Növbəti yazımızın Milli Qəhrəmanı Nəsrəddinov Rafiq Hüseyn oğludur. O, zabitlikdən mühəndisliyə ordan da Baş leytnantlığa addımlayacaq şərəfli ömür yolunun sahibidir.
Rafiq Nəsrəddinov 8 mart 1961-ci ildə Bakı şəhərində dənizçi ailəsində dünyaya göz açıb. Sadə, zəhmətkeş bir ailənin yetirməsi olan Rafiq ağıllı və uzaqgörən bir övlad olub. Orta təhsilini də doğulduğu Bakı şəhərində alıb. 1968-ci ildə Bakının Nərimanov rayonundakı 39 saylı orta məktəbə gedərək tam on illik orta təhsilini həmin məktəbdə 1978-ci ildə bitirir. Bir il sonra Vətənə xidmət borcu yaranır deyə Rafiq 1979-cu ildə Nərimanov rayon Hərbi Komissarlığı tərəfindən hərbi xidmətə çağırılır. Hərbi xidmətə yollanmaqla 1981-ci ildə tank qoşunlarında xidmətini uğurla başa vurur. Həyatında müsbət dönüşlər baş verir. O illərdir arzuladığı təhsil həyatına qovuşur. Bakı Dövlət Universitetinə daxil olan Rafiq 1987-ci ildə universiteti müvəffəqiyyətlə bitirir. Ali təhsilini başa vurduqdan dərhal sonra iş həyatına atılır, Su Təsərrüfatı İnstitutunda mühəndis vəzifəsinə təyin edilərək orda çalışır.
O vaxta qədər ki, Qarabağda artıq elan olunmamış müharibə başlayır. Torpaqlarımız, insanlarımız ermənilərin hücumuna məruz qalır. Təbii ki, Rafiq Nəsrəddinov buna göz yuma bilməzdir. Həm də o zabit idi. Beləcə O, 1992-ci ildə bir zabit kimi Səbail rayon Hərbi Komissarlığı tərəfindən Milli Ordu sıralarına çağırılır. Cəbhəyə gəldiyi ilk gündən özünü təcrübəli zabit kimi göstərir və döyüş qaydaları, orduya nəzarət ,hücum qaydaları onun təcrübəli döyüşçü kimi bildiyi təcrübədir. Rafiq həm də xaraktercə də mərd, zəbrli və təmkinli idi. Ona sahib olduğu bu xasiyyətlər döyüş dostları arasında böyük hörmət qazandırır. Zaman-zaman döyüş və peşəkar zabit təcrübəsi komandanlıq gözündə də onu seçilənlərdən edir. Bunu nəzərə alan komandanlıq onu tank hərbi hissəsinin qərargah rəisi təyin edir O, Ağdərə rayonunun bir sıra kəndlərinin erməni işğalından təmizlənməsində yaxından iştirak edərək dəfələrlə qəhrəmanlıq nümunəsi göstərir. Döyüş yoldaşlarının yaddaşında bu qəhrəmanlıq həmişə unudulmaz xatirələr kimi əbədiyyət qazanır. Baş leytnant rütbəsinə öz xidmətləri ilə layiq olan Rafiq Nəsrəddinovun son döyüşü 6 sentyabr 1992-ci ildə Ağdərə rayonunun Qızılqaya kəndində gerçəkləşir. Bu çox qeyir-bərabər döyüş idi. Əslində döyüşlərin hər biri belə idi. Sadəcə onun hərbi taktikası və məharəti sayəsində heyyəti uğur qazanır, məğlubedilməz olurdu. Ancaq sonuncu qeyri-bərabər döyüşdə son nəfəsinədək vuruşaraq, qəhrəmanlıqla həlak olur. Döyüş yoldaşları onu belə xatırlayır : Rafiq son döyüşündə də məğlubedilməz qəhrəman kimi cəsarətlə döyüşür, son nəfəsinədək qətiyyən düşmənə təslim olmaq istəmirdi”
O, Vətəni uğrunda canını, qanını töksə də, tariximizə igidlik salnaməsi yazsa da , bizlər belə igid, ləyaqətli, savadlı , peşəkar mütəxssis oğullarımızın, vətəndaşlarımızın itkisi üçün kədərlənirik. Rafiq igid , qəhrəman oğul olmaqla yanaşı, savadlı, təhsilli bir gənc, bir mühəndis idi. Onun zəhmət və fədakarlığı bütöv Vətən adına böyük xidmətdir.
Bakı şəhərinin Şəhidlər xiyabanında dəfn edilib.

Rafiq Nəsrəddinov həm də ailə başçısı, iki qız atası idi. Övladları ondan Vətənə yadigar qalıb.
Azərbaycan Respublikası prezidentinin 16 sentyabr 1994-cü il tarixli 203 saylı fərmanı ilə baş leytenant Nəsrəddinov Rafiq Hüseyn oğluna ölümündən sonra “Azərbaycanın Milli Qəhrəmanı” adı verilmişdir.

Hazırda oxuduğu 39 saylı orta məktəb Milli Qəhrəmanımızın adını daşıyır. Məktəbdə büstü qoyulub. Yaşadığı binanın önünə xatirə lövhəsi vurulub.
Günel Sabirqızı Atatv.az saytının xüsusi müxbiri