“Şəkidə istirahət mərkəzində bədbəxt hadisə baş verib, 2 nəfər ölüb”
Xəbər bu başlıqla müxtəlif media orqanlarında yayımlandı. İki gənc oğlan istirahət etmək istərkən kanatın qopması nəticəsində 40 metr yüksəklikdən yerə çırpıldı.
İldə minlərlə tursitin üz tutduğu məşhur Şəki yaylasında hadisə baş verib. Məlumata görə, Şəkinin Baş Kəldək kəndində yerləşən istirahət mərkəzində ölüm halı qurğunun trosunun qırılması nəticəsində baş verib. Ölənlərin Qax rayon sakini 31 yaşlı Coşqun Məmmədov və 27 yaşlı Ucal Bayramov olduğu bildirilir.
Faktla bağlı araşdırma aparılır deyilsə də sonuc təbii ki, həmin istirahət mərkəzində əsl səbəbin gizlədilməsi ilə nəticələnəcəyi ilə sonuclanacaq. Çünki hər halda kanat biznesi ilə məşğul olanlar, turistik zona olan Şəkinin belə yaylağında turizmdən pul qazananlar bu işə məsuldur. Minlərlə turist il ərzində elə təkcə Şəki yaylasına isti aylarda üz tutur. Əgər turistin təhlükəsinə və orda quraşdırılan kanat və əyləncə atreksionlarının təhlükəsizliyinə cavabdeh deyillərsə nədən bu qədər insanların həyatını təhlükəyə atırlar?
Hadisənin üzə çıxarılmayan və yerli sakinlər tərəfindən verilən məlumatlara əsasən səbəb məsuliyyətsizlikdir. Belə ki, hadisə şahidlərinin Qəzetçi-yə verdiyi məlumata görə, istirahət mərkəsində “zipline” tipli 2 kanat xətti var.
Onların sözlərinə görə bu kanatlarda oturacaqlar kabinetə yox, birbaşa xəttə bağlanır. Qəza oturacağın kanata bağlanan hissəsinin qopması nəticəsində baş verib.
Mənbənin sözlərinə görə, istirahət mərkəzindəki iki kanat xəttinin biri standartlara uyğun inşa edilsə də, digəri kustar üsulla quraşdırılıb. Qəzanın kustar üsulla hazırlanan xəttdə baş verdiyi bildirilir. Hadisə yerində Fövqəladə Hallar Nazirliyinin və prokurorluğun əməkdaşları araşdırma aparır.
Onu da qeyd edək ki, “Şəki Yaylası” İstirahət Mərkəzi “MGN GROUP” MMC məxsusdur. Şirkətlər qrupuna həm də Şabrandakı “Bağcalı”Hotel, Novxanı qəsəbəsində dəniz sahilində yerləşən “My Beach” otel-istirahət mərkəzi daxildir.
Şirkətin Məhərrəm Novruzov adlı tanınmış iş adamına məxsus olduğu söylənilir.

Bəli, kustar üsulla kanat inşası iki gəncin həyatına son qoydu. Güman ki, bu şirkət rəhbərini heç narahat etməyəcək. Bədbəxt hadisə deyib unutduracaq və gündəmdən yoxa çıxaracaqlar. Ancaq çox vaxt bu cür bədbəxt hadisələr hansısa məsuliyyətsiz addımların və iri biznes maraqlarının acı nəticəsidir. Lap real məhkəmənin diqtəsindən xilas olsalar da, ancaq Allah qatında buna cavab verməli olacaqlar!
Allah rəhmət eləsin!
ATATV.AZ saytının xüsusi müxbiri Günel Sabirqızı