Hər bir xalqın tarixində elə dönəm nöqtələri var ki, millətin taleyini, gələcəyini və azadlıq iradəsini müəyyən edən müqəddəs səhifələrdir. 12 Noyabr tarixi də məhz belə unudulmaz tarixlərdəndir. Müstəqil Azərbaycanın ilk Konstitusiyasının qəbul olunduğu bu gün hüquqi dövlətçiliyimizin təməl daşı, xalqımızın siyasi yetkinlik imtahanından üzüağ çıxmasının simvoludur.

1995-ci ilə nəzər salanda, gənc müstəqil dövlətin keçdiyi keşməkeşli yollar göz önündə canlanır. O dövrdə Azərbaycan böyük geosiyasi təzyiqlər, daxili çəkişmələr və iqtisadi böhran girdabında idi. Belə bir həssas məqamda Ümummilli Lider Heydər Əliyevin rəhbərliyi ilə hazırlanan Konstitusiya sadəcə hüquqi akt deyildi; o, dağılmaq təhlükəsi ilə üz-üzə qalan dövlətin xilasetmə anı, cəmiyyətin isə əmin-amanlıq və inkişaf manifesti idi. Ulu Öndərin dediyi kimi, Əsas Qanun uzunmüddətli müzakirələrdən, xalqın hər bir təbəqəsinin rəyi nəzərə alınmaqla ərsəyə gəlmişdi və məhz buna görə də o, cəmiyyətin bütün təbəqələrini birləşdirən ümumi məxrəcə çevrildi.

Konstitusiya cəmiyyətin yazılmamış vicdanını yazılı qanunlara çevirən sənəddir. O, hər bir vətəndaşa hüquqlarını bəxş etməklə yanaşı, dövlətə də məsuliyyət yüklədi: insan ləyaqətini qorumaq, ədaləti bərqərar etmək və azadlıqları təmin etmək. Əsas Qanunumuzda təsbit olunan demokratik dəyərlər illər keçdikcə daha da möhkəmləndi, cəmiyyətimizin siyasi və hüquqi mədəniyyətinin ayrılmaz hissəsinə çevrildi.

Bu gün biz Konstitusiya Gününü tamamilə fərqli, tarixi reallıqlar fonunda qeyd edirik. Azərbaycan dövləti artıq öz ərazi bütövlüyünü və suverenliyini tam bərpa etmiş qalib ölkədir. Konstitusiyamızın ruhu – onun hər bir vətəndaşın hüquqlarını qorumaqla yanaşı, dövlətin ərazi bütövlüyünü və toxunulmazlığını təmin etmək prinsipi bu gün bütün ölkə ərazisində – Xankəndidə, Şuşada, Laçında tam mənası ilə reallaşıb. Zəfərimiz Əsas Qanunumuzun ali məqsədlərinin praktiki təntənəsinə çevrildi.

Hüququn aliliyi güclü dövlətin, güclü dövlət isə rifah içində yaşayan azad vətəndaşın varlığı deməkdir. 12 Noyabr – Konstitusiya Günü bizə bir daha xatırladır ki, azadlıq təkcə qazanılan haqq deyil, həm də onu qorumaq, qanunlara hörmət etmək məsuliyyətidir.

Qoy Konstitusiyamızın hər bir maddəsi dövlətimizin əbədiyyət sənədi, cəmiyyətimizin isə sarsılmaz həmrəylik zirehi olsun! Konstitusiya Günümüz mübarək!

Yeganə Qəhrəmanova

ADPU-nun dosenti, filologiya üzrə fəlsəfə doktoru,

Azərbaycan-Türk Xalqları Qardaşlığı İctimai Birliyinin həmsədri,

İctimai Xəbər Agentliyi və ATA TV-nin direktoru