Tarix yaddaşımıza əbədi həkk olunan Vətən müharibəsi Azərbaycanın ərazi bütövlüyü ilə yanaşı, həm də əsl igidlərin, dözüm və mərdlik simvollarının şücaət dastanını yazdı. Bu dastanı qanı və canı ilə yazanlardan biri də 44 günlük Zəfər tariximizin qürur mənbəyi, 3 qat dünya, 6 qat ölkə çempionu, Xüsusi Təyinatlı Qüvvələrin igid döyüşçüsü, şəhid İlkin Məmmədovdur. O, təkcə idman meydançalarında bayrağımızı ucaldan çempion deyil, həm də Vətənin dar günündə heç bir tərəddüd etmədən ön cəbhəyə atılan əsl zəfər şəhididir.

İlkin Məmmədov 1990-cı il noyabrın 26-da Füzuli rayonunun Aşağı Kürdmahmudlu kəndində Abdullah və Ofelya Məmmədovların ailəsində anadan olmuşdur. Ailənin ilk övladı olan İlkinin bir qardaşı və iki bacısı var idi. İlk təhsil illəri doğulduğu kənddə, 9-cu sinifdən isə Şəhid Mirzə Kərəm Əliyev adına tam orta məktəbdə keçmiş, 11-ci sinfi Abşeron rayonu Saray qəsəbə 2 nömrəli Şəhid Müstəfərov adına tam orta məktəbdə başa vurmuşdur.

Hələ 5 yaşında ikən idmana olan tükənməz həvəsi onun bütün həyat yolunun əsas istiqamətini müəyyənləşdirdi. İdmana başladığı ilk gündən şəhadətə ucalana qədər bu yoldan bir an olsun çəkilmədi. Əzmkar təbiəti və iradəsi sayəsində o, idmanda misilsiz uğurlara imza atdı:

Müxtəlif idman növləri üzrə 40-dan çox diplom, 20-dən artıq sertifikat və 9 fəxri fərman

MMA üzrə qara kəmər sahibi, 3 qat dünya, 6 qat Azərbaycan, 3 qat respublika və ölkə çempionatı titulları qazandı.

Karyerası ərzində 30-dan çox birinci və ikinci yerlər, həmçinin 13 kubok əldə etdi.

Alpaqut və Karate federasiyalarında, eləcə də əlbəyaxa döyüş növləri üzrə beynəlxalq dərəcəli məşqçi-müəllim və beynəlxalq dərəcəli referi statusu aldı.

Hərbi xidmətini başa vurduqdan sonra belə hərbə olan sonsuz sevgisi onu yenidən ordu sıralarına bağlamışdı. Üç il Dəniz Qüvvələrində fədakarlıqla çalışmış, müəyyən fasilədən sonra – 2020-ci ilin sentyabrında Vətən müharibəsi başlanan kimi könüllü olaraq Xüsusi Təyinatlı Qüvvələrə (052) yazılmışdı.

O, Füzuli və Şuşanın azadlığı uğrunda gedən ən qızğın döyüşlərin ön xəttində vuruşdu. İdman döyüşlərində qazandığı qələbələri bu dəfə real döyüş meydanında – düşmənə qarşı mərdliklə təkrarladı. Füzulinin Qırmızı bazar adlanan məkanında düşmən gülləsindən yaralansa da, mübarizəsini dayandırmadı. Noyabrın 2-də Şuşada gedən ağır əlbəyaxa döyüşlərdə əsl qəhrəmanlıq nümunəsi göstərərək şəhidlik zirvəsinə ucaldı və noyabrın 4-də Abşeron rayonu Saray qəsəbəsində yerləşən Şəhidlər Xiyabanında dəfn olundu. Arxasında iki azyaşlı qız övladı – ata nəfəsinə həsrət qalan əmanətlərini qoyub getdi.

İlkin kimi oğulların qanı və canı ilə yazıldı bu Zəfər. O, övladlarına layiq ata, tələbələrinə nümunəvi müəllim, Vətəninə isə sadiq bir igid olaraq yaşadı. Onun parlaq xatirəsi, idman meydanlarındakı zəfərləri və döyüşlərdəki şücaəti hər zaman Azərbaycan xalqının qəlbində əbədi yaşayacaq, gənc nəslə unudulmaz bir qəhrəmanlıq məktəbi olaraq qalacaqdır.

Yeganə Qəhrəmanova

ADPU-nun dosenti, filologiya üzrə fəlsəfə doktoru,

Azərbaycan-Türk Xalqları Qardaşlığı İctimai Birliyinin həmsədri,

İctimai Xəbər Agentliyi və ATA TV-nin direktoru