BİRİNCİ VİTSE-PREZİDENT, AZƏRBAYCANIN BİRİNCİ XANIMI MEHRİBAN ƏLİYEVA HAQQINDA

Mehriban Arif qızı Əliyeva 26 avqust 1964-cü ildə Bakı şəhərində ziyalı ailəsində dünyaya gəlib. Uşaqlıqdan elmə, təhsilə və milli-mənəvi dəyərlərə bağlı mühitdə böyüyən Mehriban Əliyeva 1981-ci ildə Bakı şəhərindəki 23 nömrəli orta məktəbi qızıl medalla bitirib. Daha sonra Azərbaycan Dövlət Tibb İnstitutunun müalicə-profilaktika fakültəsində təhsil alıb.
1988-ci ildə İ.M. Seçenov noadına Birinci Moskva Dövlət Tibb İnstitutunu fərqlənmə diplomu ilə başa vurub. 1988–1990-cı illərdə göz xəstəlikləri ixtisası üzrə klinik ordinatura keçib, 1990–1995-ci illərdə isə Moskvada Elmi Tədqiqat Göz Xəstəlikləri İnstitutunda çalışıb.
Həkimlik fəaliyyəti onun həyat yolunun mühüm mərhələlərindən biri olsa da, sonrakı illərdə Mehriban Əliyevanın ictimai və mədəni fəaliyyətində yeni bir səhifə açılıb.
1995-ci ildə Azərbaycan Mədəniyyət Fondunu təsis edən Mehriban Əliyeva 1996-cı ildə Azərbaycan mədəniyyətinin təbliği məqsədilə “Azərbaycan–İrs” jurnalını yaradıb. Sonrakı illərdə onun fəaliyyəti milli-mədəni irsin qorunması, Azərbaycan mədəniyyətinin beynəlxalq səviyyədə tanıdılması və müxtəlif sosial layihələrin həyata keçirilməsi istiqamətində genişlənib.
Azərbaycan muğamının qorunması və dünyada təbliği də Mehriban Əliyevanın fəaliyyətində mühüm yer tutur. Beynəlxalq Muğam Festivalları, muğam müsabiqələri və bu sənətin gələcək nəsillərə çatdırılmasına yönəlmiş layihələr Azərbaycan musiqi mədəniyyətinin dünyaya təqdim olunmasına xidmət edib.
Onun fəaliyyəti muğamla məhdudlaşmayıb. Mədəniyyət və incəsənət sahəsində mühüm tədbirlər, beynəlxalq layihələr, sosial təşəbbüslər və xeyriyyə aksiyaları da ictimai fəaliyyətinin mühüm istiqamətlərindən olub.
2002-ci ildə Azərbaycan Gimnastika Federasiyasının prezidenti seçilməsi onun fəaliyyətində daha bir istiqamətin başlanğıcı olub. 2004-cü ildən Heydər Əliyev Fonduna rəhbərlik edən Mehriban Əliyevanın fəaliyyəti təhsil, səhiyyə, mədəniyyət, sosial müdafiə, uşaqlara və ehtiyacı olan insanlara dəstək kimi müxtəlif sahələri əhatə edib.

2017-ci il fevralın 21-də Mehriban Əliyeva Azərbaycan Respublikasının Birinci vitse-prezidenti təyin edilib.
Bir insanın həyat yoluna nəzər salanda yalnız tutduğu vəzifələri deyil, gördüyü işlərin cəmiyyətdə yaratdığı izləri də görmək mümkündür. Mehriban Əliyevanın həyat yolu həkimlikdən ictimai fəaliyyətə, mədəniyyətin və milli irsin təbliğindən sosial və xeyriyyə layihələrinə, dövlət idarəçiliyindən beynəlxalq mədəni təşəbbüslərə qədər uzanan geniş bir fəaliyyət salnaməsidir.
Mehriban xanımın saysız-hesabsız xidmətləri yalnız görülən işlərin siyahısında deyil, xalqın yaddaşında və qəlbində də öz əksini tapır. Onun fəaliyyəti haqqında yazılan əsərlər, səslənən şeirlər və bəstələnən mahnılar bir insanın cəmiyyətə xidmət yolunun sənət dili ilə ifadəsinə çevrilir.
Xalq sevgisi isə hər bir insan üçün ən böyük mənəvi sərvətlərdən biridir. Sözün şeirə, şeirin nəğməyə çevrilməsi, bir insanın fəaliyyətinin sənət əsərlərində yaşadılması həmin sevginin zamanın fövqünə yüksəlməsidir.
Mehriban xanım öz əməlləri, xidmətləri və ictimai fəaliyyəti ilə həyat yolunun səhifələrinə öz adını yazıb. Bəzən tarix yalnız kitablarla deyil, insanların gördüyü işlərlə də yazılır. Əməllərlə yazılan tarix isə xalqın yaddaşında daha uzun yaşayır.
Mehriban xanım — qadın zərifliyi, ana qayğısı və ictimai məsuliyyətin vəhdətini özündə yaşadan bir simadır. Onun fəaliyyətində insanlara diqqət, milli-mənəvi dəyərlərə bağlılıq, mədəni irsin qorunması və cəmiyyətə xidmət anlayışı xüsusi yer tutur.
Bu əlamətdar gün münasibətilə Mehriban xanımı səmimi-qəlbdən təbrik edirəm, ona möhkəm cansağlığı, uzun ömür, ailə səadəti, ruzi-bərəkət və gələcək fəaliyyətində yeni uğurlar arzulayıram.
Arzum budur ki, ömrünün hər zaman ən gözəl çağları sevinc, xoşbəxtlik, doğmalarının sevgisi və könül rahatlığı ilə müşayiət olunsun. Hər zaman qadın zərifliyini, ana qayğısını, ictimai məsuliyyəti və Vətənə bağlılığı özündə birləşdirən Mehriban xanımın ömür yolu yeni-yeni gözəl səhifələrlə zənginləşsin.

AYNURƏ ULDUZ (TEYMUROVA)
“QIZIL QƏLƏM” MEDİA MÜKAFATI LAUREATI
Ata Tv.az saytının baş redaktorun birinci müavini