Əvvəllər paytaxt Bakı, indi isə artıq regionlarda sima və bədən nahiyədə süniləşən, doğrusu müxtəlif bədən dəyişkiliyi naminə estetik əməliyyatlardan çıxan qadınlara rast gəlmək adiləşir.
Müşahidə edirsən ki, yaşı iyirmi üstü olan bu gənc qızlar “gözəllik” naminə dodağını sima ölçüsünə nataraz şəkildə böyük, burununu isə əskinə kiçikləşdirir. Sanki “barbi”yə bənzəməklə sahib olduğu bütün qüsur və çatışmazlıqların üstünü ört-basdır edir. Ancaq anlamırlar ki, sima ölçüsünə uyğun gəlməyən bu orqanlar onlara olduğundan xoş olmayan və süni gözəllik qatır. Hələ parlaq və sağlam ana dişlərini yondurub iri həcmli vinirlərlə əvəz edib manyak görüntüsü yaradanları demirəm. Bu dişlə harda gəldi, necə gəldi gülümsəmək saxtakarlığı da bir ayrı dərd. Üz-gözümüz silikon dodaq, botokslaşmış üz , estetik burun, qulaq və dişlərlə yenicə “barışmışdı” ki, indi də bədən şəkilləndirmə, sinə böyütmə və kiçiltmə, eləcə də popo əməliyyatları olan-qalan təbiillik arzu və ümüdlərimizi yerlə-yeksan edir. Müxtəlif sosial şəbəkələrdə zaman-zaman qadın qruplarında qız və qadınların adını çəkdiyimiz üz və bədən nahiyəli əməliyyatlarına, dəyişimlərə göstərdiyi maraq və bu əməliyyatlar naminə uğurlu həkim axtarışları ilə rastlanırıq. Bəzən ali tibb təhsilli peşəkar mütəxəssislərlə yanaşı saxta , hətta tibb üzrə təhsili olmayan bir xeyli “həkim -cərrahlar”ın da meydanda at oynatdığını, müxtəlif aldadıcı üsullarla reklam vasitəsilə şəxsini tanıtım etdirərək xeyli xəstələri özünə qurban seçməyi bacardığının şahidi oluruq. O qədər stomatoloq, kosmetoloq, cərrah adı ilə əslində qeyri profilli, hətta təshili belə olmayan dələduzların tanınmış həkim obrazında media orqanlarına çıxması, sponsorlu verişilərdə həkim qismində qonaq olması bu əyri, ancaq gəlirli biznesin artmasına daha da rəvac verir. Zaman-zaman bu problemin ciddi nöqsan və çatışmazlıqları, əllərində çoxsaylı ölüm və yalnış əməliyyatlar prosedurlar nəticəsində aşkarlansa da, ancaq hansısa əllər və dəstək sayəsində həkim sayları bitmir, yerləri daha da möhkəmlənir. Xəstələri isə gündən-günə artır. Hələ bu tip əməliyyatlarda ölən və əlil qalan xəstələrin aqibəti də heç çoxuna dərs olmur. Məsələn, ötən gün mediada belə bir xəbər yayımlandı ki, üç cərrahın ixtissasına uyğun olmadığı əməliyyat keçirməsi aşkarlanıb. Bu aşkarlanma yenə də bir çox sahələrdəki nəzarət və boşluqların olmasını açıq-aşkar göstərir. Xəbərdə qeyd edilir ki, ötən ay ümumilikdə 22 klinika və 3 plastik cərrah barəsində inzibati tənbeh tədbirləri tətbiq edilib.
Analitik Ekspertiza Mərkəzindən bildirilib ki, aşkarlanan pozuntularla bağlı İnzibati Xətalar Məcəlləsinin müvafiq maddələrinə əsasən protokollar tərtib olunub.
Müəyyən edilmiş əsas pozuntular arasında sertifikasiya şəhadətnaməsi olmadan özəl tibb fəaliyyəti ilə məşğul olma, lisenziyada nəzərdə tutulmayan fəaliyyət növlərinin həyata keçirilməsi, yararlılıq müddəti bitmiş və ya dövlət qeydiyyatından keçməmiş dərman vasitələrindən istifadə, yoxlama prosesinə maneə yaradılması, eləcə də lisenziya olmadan özəl tibb fəaliyyətinin həyata keçirilməsi halları yer alıb.
AEM-dən o da bildirilib ki, 2 ümumi cərrah və 1 üz-çənə cərrahının ixtisasına uyğun olmayan plastik cərrahiyyə əməliyyatları həyata keçirməsi faktı aşkarlanıb. Bu hallar İnzibati Xətalar Məcəlləsinin 215.1-ci maddəsi ilə qiymətləndirilib və hər bir fakt üzrə ayrıca protokol tərtib olunub.
Qeyd olunub ki, tibb xidmətləri sahəsində yol verilən qanun pozuntuları vətəndaşların sağlamlığı və həyatı üçün birbaşa risk yarada bilər. Bu səbəbdən Analitik Ekspertiza Mərkəzi tərəfindən aparılan yoxlamaların sistemli, şəffaf və nəticəyönümlü xarakter daşıdığı vurğulanıb.
O da bildirilib ki, pozuntu halları aşkarlandıqda dərhal inzibati tədbirlər görülür və nəticələr müvafiq icra strukturlarına göndərilir.

Xub, əgər Analitik Ekpertiza Mərkəzi buna məsuldursa, indiyə qədər nədən belə sistemli,şəffaf və nəticəyönümlü araşdırmalar aparmayıb ki, nəticədə belə xoşagəlməz hallar, qurbanlar çoxalır. Əminəm ki, bir müddət sonra xəbərdə qeyd olunan üç cərrah həkim yenidən hansısa klinika və xəstəxanada iş başında aşkarlanacaq və yenə də xeyli cahil xəstə ona əməliyyat üçün borc da olsa minlərlə manatlıq pulunu xərcləyəcək. Ümumilikdə bu tip əməliyyatlar minumum 1200, maksimum 10-15 min manatlıq və bəlkə də daha yuxarı qiymət civarında olur. Xüsusilə də əksəriyyəti ya son dolanışıq pulunu, ya da borc olaraq hansısa bank və lombardan götürdüyü pulu bu tip acgöz həkimlərə yedirdirlər. Həkimlər də bu pulun müqabilində bunları eybəcər, qeyri insani cildə salıb əcəb bədən şəkilləndirmə edəcək. Hələ bu azmış kimi, əməliyyat prosedurlarını, xəstənin ən məhrəm yerlərini belə şəklini çəkib müxtəlif sosial şəbəkə hesablarında reklam naminə paylaşacaq. Vaxt vardı istənilən çıplaq görüntü həya görüntüsü, mənəviyyat məsələsi, ölüm-qalım məsələsi idisə, indi sanki açıq bazardır. Sinə, arxa və cinsiyyət orqanlarının görüntüsü reklam obyekti olur, növbəti müraciətçilərin maraq və diqqətini cəlb edir. Çoxu da adətən evli qadınlar, evli xanımlar olur, ya da boşanmışlar. Subaylar arasında da çoxdur maraq göstərənlər. Maraqlıdır ki, qadınlar bir kişiyə görəmi özünü bıçaq altına salır, yoxsa gerçəkdən həmcinslərinə acıq-qıcıq vermək, süni gözəllik yarışmasında yer almaq istəyindən qaynaqlanır?
Hər halda heç birinə dəyməyəcək bu cür əməliyyatlar ciddi özgüvən kompleksi və sarsılan mənəviyyat məsələsinin acı nəticəsi olduğunu bəlkə illər sonra anlayacaqlar, ancaq hələ ki, cəmiyyət artan maraq naminə bu cür süni gözəllik əməliyyatlarının peşindədir. Savadlı, təhsilli, düşünən , əxlaq sahibləri belə əməliyyatları ağlından belə keçiməz, nəinki istəsin.
Aidiyyəti qurumlara isə deyəsən alacaqları rüşvət və bisnes maraqları fonunda hələki bu dəhşətli dərəcədə artan eybəcərliyin verdiyi və verəcəyi acı nəticələr maraqlı deyil. Kapitalist maraqlar bütün mənəziyyatı alt-üst edir deyəndə bu canlı sübutdur.
Əvvəllər “gözəllik ondur, doqquzu dondur” deyən atalara indiki gənclik gözəllik ondur, doqquzu əməliyyatdır” deyə cavab verir və şəxsində göstərir.
Ən dəhşətlisi isə bu tip əməliyyatlar əvvələr qadınlar arasında yayğın idisə indi lazeroloq, kosmetoloq xidmətindən geniş şəkildə yararlanan, siması botokslaşan, gelləşən, qaşları nazilən kişilərin sayı da durmadan artır...
Əvvəllər qadınlar bir-birinə bəznəyirdisə, indi “kişilər” də onlara bənzəyir. Adam qadın halı ilə onlara baxanda utanır ki, desin: Ay kişi get aynada özünə bax, gör nəyə bənzəyirsən?
Təmzilik, gözəllik ayrıdır, aşırı özünə əl qatmaq, özünü dəyişdirmək, qeyri insani cildə salmaq artıq mənəviyyat və əxlaqi dəyərlərin itməsidir.
ATATV. AZ saytının xüsusi müxbiri Günel Sabirqızı