Azərbaycan mətbuatında cəsarətli və kəskin çıxışları ilə tanınan azadfikirli jurnalist Əvəz Zeynallını son mənzilə yola saldıq. Onunla vida mərasimi yalnız bir insanın bu dünyadan köçməsinə üzülmək deyil, azad sözə, cəsarətə hörməti əks etdirirdi.

Mərasimə toplaşan insanların baxışlarında yalnız hüzn yox, həm də ağır bir sükut var idi. Doğmaları, həmkarları, dostları və şəxsiyyətinə ehtiram göstərənlər üçün Əvəz Zeynallı ilə vida çox çətin idi. Çünki heç vaxt susmayan, haqsızlığa qarşı mübarizədən yorulmayan cəsarətli bir insan fani dünyadan ayrılırdı.

Vida mərasimində səslənən hər cümlə, xatırlanan hər bir xatirə Əvəz Zeynallının jurnalistika fəaliyyətində tutduğu barışmaz mövqeyi, azad sözə olan sadiqliyini, dözüm və cəsarətini bir daha gözlər önünə gətirdi.

Dəfn yerində ucalan dualar və son pıçıltılar bir həqiqəti xatırladırdı: İnsanlar gələr-gedər, lakin cəsarətlə yazılan sözlər, prinsipial mövqe və buraxılan silinməz izlər heç vaxt unudulmaz.

Əvəz Zeynallı fiziki olaraq aramızdan ayrılsa da, onun jurnalistika tariximizdə qoyduğu irs, prinisipiallıq və azad düşüncəyə olan inamı onu tanıyanların, oxucularının və gələcək qələm sahiblərinin yaddaşında yaşamağa davam edəcək. Onu yaxından tanıyan bir jurnalist həmkarı kimi ailəsinə, əzizlərinə, həyat yoldaşı Məlahət xanıma dərin hüznlə başsağlığı verir, səbir diləyirəm.

Ruhu şad, məkanı cənnət olsun.

Rasafil Bayramov

ATA TV və İXA-nın təsisçi-baş direktoru