Azərbaycanda 18 yaşadək uşaqların sayı təxminən 2 milyon 730 min nəfərdir. Bu rəqəm həm böyük bir məsuliyyət, həm də gələcəyimizə veriləcək böyük diqqətin göstəricisidir.
Hər uşağa heç olmasa 150 manat aylıq uşaq pulu verilməsi ailələr üçün müəyyən sosial dəstək ola bilər. Bu vəsait uşağın ərzağına, geyiminə, məktəb xərclərinə, dərmanına, nəqliyyatına və digər gündəlik ehtiyaclarına sərf edilə bilər.
Bəziləri üçün 150 manat böyük məbləğ kimi görünməyə bilər. Amma maddi çətinlik yaşayan bir ailə üçün bu məbləğ ayın müəyyən bir ehtiyacını qarşılamaq, uşağın məktəb xərclərini ödəmək və ya süfrəsinə əlavə ərzaq almaq deməkdir. Xüsusilə uşağını tək böyüdən valideynlər, çoxuşaqlı ailələr və gəliri məhdud olan ailələr üçün belə sosial yardım əhəmiyyətli dəstəyə çevrilə bilər.
UŞAQ PULU SADƏCƏ MADDİ YARDIM DEYİL, UŞAĞA VƏ ONUN GƏLƏCƏYİNƏ GÖSTƏRİLƏN DİQQƏTDİR.
Uşağın sağlam böyüməsi, yaxşı qidalanması, təhsil alması və özünü inkişaf etdirməsi yalnız ailənin deyil, bütövlükdə cəmiyyətin və dövlətin gələcəyi baxımından vacibdir.
Bu məsələ yalnız bu günün ehtiyacları ilə də məhdudlaşmır. Uşağa ayrılan hər bir vəsait əslində gələcəyə qoyulan sərmayədir.
Çünki bu gün məktəbə gedən balaca bir uşaq sabah alimimiz, həkimimiz, müəllimimiz, jurnalistimiz, hərbçimiz, mühəndisimiz, hüquqşünasımız, deputatımız, nazirimiz və ölkəsinə fayda verən başqa bir mütəxəssis ola bilər.
Ona görə də uşaqların sosial müdafiəsi haqqında düşünərkən yalnız bugünkü xərci deyil, sabahın insan kapitalını düşünmək lazımdır.
Uşağın ehtiyacına vaxtında verilən dəstək onun təhsilinə, sağlamlığına və gələcək həyatına müsbət təsir göstərə bilər. Güclü ailə, sağlam uşaq və savadlı nəsil isə güclü cəmiyyətin əsas dayaqlarındandır.

UŞAQLAR BİZİM GƏLƏCƏYİMİZDİR. ONLAR BİZİM İŞIĞIMIZ, SABAHIMIZ VƏ ÜMİDİMİZDİR. BU GÜN ONLARA VERDİYİMİZ DƏSTƏK SABAH CƏMİYYƏT OLARAQ QARŞIMIZA ÇIXACAQ.

AYNURƏ ULDUZ “Atatv.az” saytının direktorun birinci müavini.