Məktəb bizim yol göstərən çırağımız, istiqamətimiz və bilik mənbəyimizdir. Məktəbə qədəm qoyan uşaq ilk növbədə biliyə, elmə və müəllimin öyrətdiklərinə köklənməlidir.
Mən hesab edirəm ki, məktəblərdə müəllimlər üçün də müəyyən vahid geyim formasının tətbiqi barədə düşünmək olar. Necə ki, polislərin, həkimlərin, aşpazların və bir sıra digər peşə sahiblərinin özünəməxsus geyim forması var, müəllimlər üçün də məktəb mühitinə uyğun, səliqəli və vahid geyim forması müəyyən edilə bilər.
Burada məqsəd müəllimin geyim seçiminə müdaxilə etmək deyil. Əsas məqsəd uşaqların diqqətini geyimdən və geyimdəki brend markalardan uzaqlaşdıraraq dərsə və biliyə yönəltməkdir.
Çünki məktəbdə uşağın diqqəti müəllimin geyimindəki brend markalara deyil, müəllimin sözünə, biliyinə, dünyagörüşünə və öyrətdiyi dərsə yönəlməlidir. Uşaq müəllimin hansı markanı geyindiyini deyil, ondan nə öyrəndiyini xatırlamalıdır.
Düşünürəm ki, bu məsələ ilə bağlı müəllimlərin, valideynlərin və ən əsası, şagirdlərin fikirlərinin öyrənilməsi də faydalı olar. Ümid edirəm ki, Təhsil Nazirliyi bu mövzuda aparılan sorğuları və ictimai fikirləri nəzərə alaraq məsələyə diqqətlə yanaşar.

Məktəbin əsas məqsədi dəbdəbəni deyil, biliyi önə çıxarmaqdır. Çünki gələcəyin savadlı nəsli müəllimin geyiminə deyil, onun verdiyi biliyə baxaraq formalaşır.

AYNURƏ ULDUZ “AtaTv.az” saytının baş redaktorun birinci müavini
ŞAİR, JURNALİST, YAZIÇI-PUBLİSİST