1961-ci il dekabrın 24-də Bakıda dünyaya göz açan İlham Heydər oğlu Əliyevin həyat yolu illər keçdikcə Azərbaycanın siyasi tarixinin mühüm səhifələrindən birinə çevrildi. Orta məktəb illərindən ali təhsilə, elmi fəaliyyətindən dövlət idarəçiliyinə qədər uzanan bu yol uzun illərin təcrübəsi və siyasi fəaliyyət mərhələlərindən keçdi.
Moskva Dövlət Beynəlxalq Münasibətlər İnstitutunda təhsil alan, daha sonra elmi fəaliyyət göstərən İlham Əliyev 1985-ci ildə tarix elmləri namizədi elmi dərəcəsi aldı və 1990-cı ilədək həmin institutda müəllim kimi çalışdı. Sonrakı illərdə biznes sahəsində fəaliyyət göstərdi, 1994-cü ildən isə Azərbaycan Respublikası Dövlət Neft Şirkətində rəhbər vəzifələrdə çalışaraq Azərbaycanın neft strategiyasının həyata keçirilməsində iştirak etdi. Milli Məclisin deputatı seçildi, Milli Olimpiya Komitəsinə rəhbərlik etdi, Yeni Azərbaycan Partiyasında müxtəlif rəhbər vəzifələr tutdu və 2003-cü ilin avqustunda Baş nazir təyin edildi.
2003-cü il oktyabrın 15-də İlham Əliyev Azərbaycan Respublikasının Prezidenti seçildi. Bununla onun həyatında yeni bir mərhələ, Azərbaycanın siyasi tarixində isə yeni bir dövr başladı. Sonrakı illərdə — 2008, 2013, 2018 və 2024-cü illərdə keçirilən prezident seçkilərində yenidən prezident seçildi.
Prezidentlik illəri Azərbaycanın iqtisadi, siyasi və sosial həyatında müxtəlif dəyişikliklərlə, qarşıya çıxan mürəkkəb proseslər və mühüm tarixi hadisələrlə yadda qaldı. Bu yolun ən böyük və tarixi dönüş nöqtələrindən biri isə 2020-ci ilin Vətən müharibəsi oldu.
44 günlük müharibə nəticəsində Azərbaycan Ordusunun rəşadəti ilə torpaqlarımızın böyük hissəsi işğaldan azad edildi. Şəhidlərimizin müqəddəs qanı, qazilərimizin qəhrəmanlığı və əsgər-zabitlərimizin şücaəti ilə qazanılan Zəfər xalqımızın yaddaşında əbədi yaşayacaq.
Bu Zəfərin siyasi rəhbəri və Ali Baş Komandanı kimi İlham Əliyevin adı da Azərbaycanın müasir tarixinin bu mühüm səhifəsində öz yerini aldı.

2024-cü ildə keçirilən prezident seçkisindən sonra andiçmə mərasimində İlham Əliyev qarşıdakı dövrdə Azərbaycanın hərtərəfli inkişafı və ərazi bütövlüyünün qorunması istiqamətində fəaliyyətini davam etdirəcəyini bəyan etdi.
Bu gün geriyə baxanda bir insanın həyat yolunda müxtəlif mərhələləri görürük: məktəb illəri, tələbəlik, elmi fəaliyyət, müəllimlik, iqtisadi sahədə iş, dövlət idarəçiliyi, siyasi fəaliyyət və nəhayət, dövlət başçılığı.
Tarix isə insanın yalnız haradan başladığını deyil, zaman qarşısında hansı iz buraxdığını da yazır.
İlham Əliyevin siyasi yolu da bu baxımdan Azərbaycanın müasir tarixinin mühüm səhifələrindən biri kimi qiymətləndirilir.
Bir siyasətçinin oğlundan dövlət başçısına, dövlət başçısından isə Zəfər tarixinin siyasi simalarından birinə qədər uzanan yol...
Bu yolun ən böyük səhifəsi isə Azərbaycan xalqının tarixi Zəfəridir.

QƏLƏBƏNİ TARİXƏ YAZAN LİDER — CƏNAB İLHAM ƏLİYEV

Zəfər tarixində öz möhürünü vurdu. Qələbənin tarixini yazan Cənab İlham Əliyev Azərbaycan xalqının Zəfər salnaməsində Ali Baş Komandan kimi adını qızıl hərflərlə yazdırdı.
Unudulmayan Zəfərin Ali Baş Komandanı kimi adı tarixdə qaldı.

AYNURƏ ULDUZ “AtaTv.az” saytının baş redaktorun birinci müavini.