Xaricdə yaşayan soydaşlarımıza, xüsusilə gənclərimizə ana dilinin öyrənilməsində müxtəlif ölkələrdə fəaliyyət göstərən diaspor təşkilatlarımızın rolu böyükdür. Diaspor təşkilatlarının bu istiqamətdə üzərinə böyük vəzifə düşür. Xaricdə yaşayan azərbaycanlıların bir araya gəlməsi yalnız milli bayramların keçirilməsi ilə məhdudlaşmamalıdır. Dil kursları, həftəsonu məktəbləri, kitab klubları, gənclər düşərgələri, ədəbi müsabiqələr və müxtəlif mədəni layihələr təşkil edilməlidir. Prezident İlham Əliyev də xaricdəki azərbaycanlıların birlik və həmrəyliyinin vacibliyini dəfələrlə vurğulayıb.

Əslində, Azərbaycan dilinin qorunması yalnız dövlətin və diaspor təşkilatlarının vəzifəsi deyil. Bu, hər bir azərbaycanlının şəxsi məsuliyyətidir. Çünki dil dövlət sərhədləri ilə məhdudlaşmır. Azərbaycan dili dünyanın müxtəlif ölkələrində yaşayan milyonlarla insanı bir-birinə bağlayan mənəvi körpüdür.

Xaricdə yaşayan azərbaycanlı gəncin Azərbaycan dilində danışması, kitab oxuması və öz fikrini bu dildə ifadə etməsi sadəcə dil biliklərinin göstəricisi deyil. Bu, onun öz kökləri ilə əlaqəsinin yaşadığını göstərir. O gənc yaşadığı ölkənin fəal vətəndaşı olmaqla yanaşı, Azərbaycan mədəniyyətinin də daşıyıcısına çevrilə bilər.

Bu baxımdan İlham Əliyevin 2011-ci ildə Dünya Azərbaycanlılarının III Qurultayındakı çıxışında səsləndirdiyi “Bizim bir vətənimiz var – Azərbaycan! Bizim bir dilimiz var – Azərbaycan dili!” fikri mövzunun mahiyyətini ifadə edən siyasi və mənəvi mesaj kimi dəyərləndirilə bilər.

Bu gün dünyada sərhədlər əvvəlkindən daha açıq, insanlar və mədəniyyətlər arasında əlaqələr isə daha intensivdir. Belə bir dövrdə milli kimliyi qorumağın ən mühüm vasitələrindən biri ana dilinə sahib çıxmaqdır. Xaricdə böyüyən hər bir azərbaycanlı gəncin Azərbaycan dilini bilməsi, bu dildə düşünə və danışa bilməsi gələcəyə atılan mühüm addımdır.

Dil unudulanda sözlər yox, yaddaşın bir hissəsi itir. Dil yaşadıqca isə xalqın səsi dünyanın harasında olursa-olsun eşidilməyə davam edir.

Yeganə Qəhrəmanova

ADPU-nun dosenti, filologiya üzrə fəlsəfə doktoru.
ATXQ İctimai Birliyinin həmsədri,
ATA TV-nin direktoru