Şirvan torpağının qoynunda qərar tutan Ağsu rayonu əsrlərin sınağından çıxmış qədim tarixi, zəngin mədəni irsi və sözə-sənətə bağlı insanları ilə Azərbaycanın mənəvi xəritəsində özünəməxsus yer tutur. Bu diyarın hər qarışında ulu babaların yadigarı olan tarixin izləri, hər elində isə ozan-aşıq nəfəsinin, poeziya ruhunun hərarəti duyulur.
Tarixin yaddaşı və söz ustadları diyarı
Ağsu torpağına qədəm qoyan hər kəs ilk anlardanca qədim Şirvan mədəniyyətinin əzəmətini hiss edir. Rayonda qorunan 24 tarixi abidə, o cümlədən qədim Qırlartəpə yaşayış yeri və XVIII əsrin yadigarı olan "Xaraba şəhər" qalıqları bu yurdun şanlı keçmişindən soraq verir. İlmələrində əsrlərin yaddaşını yaşadan dünyaca məşhur Bico xalçaları isə Şirvan xalçaçılıq məktəbinin sönməz sənət incisi kimi Ağsunun adını ucalara qaldırır.
Rayonun mədəni nəbzini Heydər Əliyev Mərkəzi, tarix-diyarşünaslıq muzeyi və sənətkarlıq evləri döyündürür. Lakin Ağsunun ən qiymətli xəzinəsi məhz onun yetirdiyi parlaq şəxsiyyətlərdir. Klassik aşıq sənətinin korifeyləri Aşıq Mirzə Bilal və Aşıq Şakirin sazı-sözü ilə yoğrulan bu müqəddəs ocaq ədəbiyyatımıza, mədəniyyətimizə Rasim Balayev, Səməndər Rzayev, Mikayıl Mirzə və şairlər, Oqtay Şamil, Mətləb Məmmədoğlu, Sabir Sarvan, Şahməmməd Şahməmmədov, Fürqani, Ziyadxan Müzəffər, Əfqan Manaflı, Abbasəli Əhmədov kimi söz - sənət adamları nəsib edib.
LƏNGƏBİZ :
Dağların ətəyindəki nur və maarif ocağı
Ağsunun bu zəngin mədəni çələngində özünəməxsus naxışı ilə seçilən ünvanlardan biri də Ləngəbiz kəndidir. Rayon mərkəzindən cənub-şərqdə, Ləngəbiz silsiləsinin ətəyində qərar tutan bu qədim yurd yeri XIX əsrdə Şirvan əyalətinin Qoşun mahalının tərkibində olub. Halal zəhməti ilə tanınan kənd əhalisi əzəldən torpağa bağlanaraq əkinçilik və maldarlıqla məşğul olub. Bu gün də elin bərəkətli torpaqlarında taxılçılıq, üzümçülük, bağçılıq və heyvandarlıq ənənələri yaşayır, kəndin ruzi-bərəkətini artırır.
Kəndin mənəvi həyatının işığı Ağamalı Qurbanov adına tam orta ümumtəhsil məktəbindən və Kənd Mədəniyyət Evindən süzülür. Təkcə elm-bilik deyil, həm də əsl tərbiyə və mədəniyyət məbədi olan bu ocaqlarda mütəmadi olaraq ədəbi-bədii gecələr qurulur, gənc nəslin qəlbinə Şirvan aşıq-ozan ruhu və Vətən sevgisi toxumları səpilir
Bir kəndin yeddi şair möcüzəsi
LƏNGƏBİZ kəndi ölkənin elm, təhsil, səhiyyə və hüquq sahələrində çalışan onlarla ziyalı yetişdirməklə yanaşı, həm də əsl poeziya beşiyi kimi tanınır. Bu kənd tez - tez ölkədə tanınan şair və yazarları öz, qoynunda cəm edir. Ləngəbiz növbəti belə ədəbi görüşə hazırlaşır. Doğma Ləngəbizdə 29 noyabr 2026-cı il tarixdə ədəbiyyatın, poeziyanın və söz sənətinin bayramı olan "Yeddi şairin kitab möcüzəsi" ədəbi-bədii görüş keçiriləcək. Onların misralarında doğma yurda sonsuz ehtiram, torpaq sevgisi və Ləngəbiz daxil Vətən təbiətinin vüqarı öz bədii təcəssümünü tapıb.
Sözü uca tutan bu gözəl ənənəni yaşatmaq və el-obanı poeziya işığında bir araya gətirmək məqsədilə indidən Ləngəbizdə "Sözümüz, sənətimiz, kəndimiz üçün..." şüarı altında möhtəşəm mədəniyyət bayramına hazırlıq görülür.
Qeyd edək ki, Ləngəbiz Kənd Mədəniyyət Evinin ərazisində keçiriləcək tədbirdə "Bir kənd, yeddi şair möcüzəsi" adlı kitab təqdimatı və poeziya bayramı keçiriləcək. "Söz birləşdirir, kitab ölümsüzdür!" ideyası ətrafında bütün kənd sakinlərini birləşdirəcək bu mötəbər tədbir Ağsu və Ləngəbiz torpağının sözə, sənətə və mənəvi dəyərlərə olan əbədi sədaqətinin ən parlaq ifadəsidir.
Rəsafil Bayramov
Atatv.az, Azadtv.az saytlarının, Milli Azərbaycan Televiziyası və İctimai Xəbər Agentliyinin təsisçisi və baş redaktoru