Bir ölkənin gələcəyi onun yalnız iqtisadi göstəriciləri ilə deyil, insanına, müəlliminə, həkiminə, təhsilinə və səhiyyəsinə münasibəti ilə də ölçülür. Bu baxımdan Mehriban Əliyevanın ictimai fəaliyyətində təhsil və səhiyyə sahələrinə, xüsusilə müəllim və həkim əməyinə göstərilən diqqət mühüm yer tutur. Onun rəhbərlik etdiyi Heydər Əliyev Fondunun həyata keçirdiyi layihələrdə insanın həyat keyfiyyətinin yüksəldilməsi, uşaqların sağlam və savadlı böyüməsi, təhsil və tibb müəssisələrinin müasir tələblərə uyğunlaşdırılması əsas istiqamətlərdən biri kimi diqqəti cəlb edir. Təhsilə münasibət ilk növbədə müəllimə münasibətdən başlayır. Çünki məktəbin ruhu, onun əsas siması müəllimdir. Müəllim şagirdə yalnız dərs proqramında nəzərdə tutulan bilikləri vermir; o, uşağın düşünməyi öyrənməsinə, özünə inam qazanmasına, dünyanı dərk etməsinə və cəmiyyət qarşısında məsuliyyət hissinin formalaşmasına təsir göstərir. Bir müəllimin sinifdə söylədiyi söz, verdiyi məsləhət və göstərdiyi diqqət bəzən şagirdin bütün həyat yoluna təsir edə bilir. Buna görə müəllim əməyinə verilən qiymət yalnız mükafat və təşəkkürlə ifadə olunmur. Müəllim üçün müasir məktəb, yaxşı tədris imkanları, rahat iş şəraiti və əməyinə cəmiyyətdə hörmət yaradılması da bu qiymətin mühüm hissəsidir. Mehriban Əliyevanın təhsil sahəsindəki fəaliyyətində məktəblərin tikilməsi və yenilənməsi, uşaqlar üçün daha əlverişli təhsil mühitinin yaradılması ilə yanaşı, müəllimin fəaliyyət göstərdiyi mühitə də diqqət yetirilməsi mühüm məqamdır. Çünki təhsil müəssisəsinə qoyulan hər bir sərmayənin arxasında müəllimin əməyi dayanır. Yeni məktəb binasının qapısından içəri daxil olan uşağın qarşısında ilk növbədə müəllim dayanır və həmin məkanın həqiqi təhsil ocağına çevrilməsi onun biliyi, zəhməti və pedaqoji ustalığı ilə mümkün olur. Müəllim peşəsi səbir tələb edən, nəticəsi illər sonra görünən və böyük məsuliyyət daşıyan peşədir. Müəllim bu gün yetişdirdiyi şagirdin sabah hansı mövqedə dayanacağını əvvəlcədən bilmir, lakin onun gələcəyinə öz zəhməti ilə töhfə verir. Bu səbəbdən müəllim əməyinə hörmət əslində gələcəyə hörmətdir. Səhiyyə sahəsində də insan amili əsas yerdə dayanır. Həkim insanın ən həssas anında onun qarşısına çıxan, biliyi və qərarı ilə sağlamlıq və həyat məsələsində böyük məsuliyyət daşıyan peşəkardır. Həkimlik sadəcə diplomla əldə olunan ixtisas deyil; bu peşə insan həyatı qarşısında vicdan, məsuliyyət, səbir və fədakarlıq tələb edir. Mehriban Əliyevanın həkimlik təhsili alması onun səhiyyə sahəsinə münasibətində xüsusi məna daşıyır. O, tibbin insan həyatı üçün əhəmiyyətini və həkim əməyinin məsuliyyətini peşə baxımından da tanıyır. Onun təşəbbüsü ilə səhiyyə sahəsində həyata keçirilən layihələrdə tibb müəssisələrinin yenilənməsi, müasir avadanlıqlarla təmin olunması, uşaqların sağlamlığının qorunması və tibbi xidmətlərin imkanlarının genişləndirilməsi istiqamətləri xüsusi yer tutur. Həkimin əlindəki bilik qədər onun işlədiyi şərait də vacibdir. Müasir avadanlıq, müasir diaqnostika və müalicə imkanları həkimin peşəkarlığını daha səmərəli şəkildə ortaya qoymasına şərait yaradır. Buna görə səhiyyə müəssisələrinin inkişafına yönələn hər bir layihə həm pasiyentə, həm də həkimə göstərilən diqqətin ifadəsidir. Xüsusilə uşaq səhiyyəsinə qayğı bu yanaşmanın ən həssas istiqamətlərindən biridir. Uşağın sağlamlığı bir ailənin deyil, bütövlükdə cəmiyyətin gələcəyi deməkdir. Balaca bir insanın xəstəliyinin vaxtında aşkarlanması, düzgün müalicə alması və sağlam həyata qayıtması üçün yaradılan imkanların arxasında böyük humanist məna dayanır. Pediatriya sahəsinin inkişafına, uşaqlar üçün tibbi xidmətlərin yaxşılaşdırılmasına və tibb müəssisələrinin imkanlarının artırılmasına yönələn təşəbbüslər bu baxımdan xüsusi əhəmiyyət daşıyır. Müəllimlə həkimi birləşdirən ən mühüm xüsusiyyət isə onların hər ikisinin insan həyatına xidmət etməsidir. Müəllim insanın dünyagörüşünü formalaşdırır, həkim onun sağlamlığını qoruyur. Müəllim gələcək nəsli yetişdirir, həkim həmin nəslin sağlam yaşaması üçün mübarizə aparır. Birinin işi sinif otağında, digərinin işi xəstəxanada görünür, lakin hər ikisinin əməyinin nəticəsi cəmiyyətin gələcəyində özünü göstərir. Məhz buna görə təhsil və səhiyyəyə münasibət yalnız ayrı-ayrı sahələrə münasibət deyil, insanın özünə verilən dəyərin göstəricisidir. Mehriban Əliyevanın ictimai fəaliyyətində məktəb və xəstəxananın, müəllim və həkimin, uşaq və ailənin ehtiyaclarının diqqət mərkəzində saxlanılması bu baxımdan xüsusi məna daşıyır. Burada əsas məsələ yalnız yeni binaların tikilməsi və ya avadanlıqların alınması deyil. Əsas məsələ insan üçün daha yaxşı şərait yaratmaq, uşağın gələcəyinə inamı gücləndirmək, müəllimin əməyinə hörmət göstərmək və həkimin məsuliyyətli fəaliyyətinə imkan yaratmaqdır. Bu yanaşmada təhsil gələcəyin qurulması, müəllim həmin gələcəyin yetişdirilməsi, səhiyyə insan həyatının qorunması, həkim isə bu müqəddəs vəzifənin daşıyıcısı kimi ön plana çıxır. Cəmiyyətin inkişafı yalnız böyük layihələrlə deyil, həmin layihələrin toxunduğu insan taleləri ilə ölçülür. Bir məktəbdə yaradılan yaxşı şərait müəllimin işinə, bir xəstəxanada yaradılan müasir imkan isə həkimin fəaliyyətinə təsir edir. Nəticədə bundan faydalanan isə uşaq, ailə və bütövlükdə cəmiyyət olur. Mehriban Əliyevanın təhsil və səhiyyə istiqamətindəki fəaliyyətinə bu prizmadan yanaşdıqda onun diqqətinin mərkəzində insan amilinin dayandığı görünür. Təhsilə göstərilən qayğı savadlı gələcək, müəllimə verilən dəyər güclü nəsil, səhiyyəyə göstərilən diqqət sağlam cəmiyyət, həkim əməyinə hörmət isə insan həyatına ehtiram deməkdir. Bu dəyərlərin qorunması və inkişaf etdirilməsi hər bir ölkənin mənəvi sərvətidir. Mehriban Əliyevanın bu sahələrdə həyata keçirdiyi təşəbbüslər də məhz təhsilin, səhiyyənin, müəllim və həkim əməyinin cəmiyyət üçün əhəmiyyətini ön plana çıxaran fəaliyyət kimi diqqət çəkir.

Müəllif: Zöhrə Səmədova
Q.Abbasov adına 284nömrəli ümumtəhsil məktəbin tarix müəllimi