İlk burdan başlayım ki, Səhiyyə sahəsində həyata keçirilən hər bir mühüm qərarın arxasında, ilk növbədə, insan amili dayanır. Bu dövlətimizin yürütdüyü siyasətin tərkib hissəsidir! Çünki insan sağlamlığının keşiyində dayanan həkim, tibb bacısı və digər səhiyyə əməkdaşlarının peşəkarlığı, məsuliyyəti və fədakarlığı bütövlükdə səhiyyə sisteminin gücünü müəyyən edən əsas amillərdəndir. Elə bu baxımdan Birinci vitse-prezident Mehriban xanım Əliyevanın təşəbbüsü ilə TƏBİB-in tabeliyində çalışan tibb işçilərinin əməkhaqlarının artırılması mühüm sosial və humanist məzmun daşıyan qərardır. Prezident İlham Əliyevin bu təşəbbüsü müsbət qarşılayaraq onun icrası ilə bağlı müvafiq tapşırıq verməsi isə dövlət siyasətində səhiyyə əməkdaşlarının sosial rifahına verilən yüksək əhəmiyyətin daha bir göstəricisidir. Yeni əməkhaqqı qaydaları 1 sentyabr 2026-cı il tarixdən tətbiq olunur və 72 212 tibb işçisini əhatə edir. Belə ki, TƏBİB sistemi üzrə bu gün illik əməkhaqqı fondunun 189 milyon manat artırılması da qərarın miqyasını açıq-aydın göstərir. Mən bu qərarın mahiyyətini rəqəmlərlə ifadə etməklə yanaşı, burada daha böyük bir mənanı göstərmək istəyirəm, yəni dövlət insanlara xidmət edən insanın özünə də qayğı göstərir ! Birinci vitse-prezident Mehriban xanım Əliyevanın fəaliyyətinin əsas xüsusiyyətlərindən biri kimi, insan amilinə həssas münasibət, humanizm və mərhəmət anlayışlarının dövlət idarəçiliyində real məzmun qazanmasıdır. Onun səhiyyə sahəsinə diqqəti də təsadüfi deyildir. Açıq deyim, həkimin gecə-gündüz demədən insan həyatını xilas etmək üçün göstərdiyi fədakarlığı, tibb bacısının xəstəyə göstərdiyi qayğını, səhiyyə əməkdaşlarının üzərinə düşən ağır məsuliyyəti qiymətləndirmək, onların sosial rifahının yaxşılaşdırılmasına çalışmaq böyük ürək və yüksək insani duyğular tələb edir. Mən şəxsən bunu öz şəxsi həyatımda görmüş və müşahidə etmişəm. Birinci xanım Mehriban Əliyevanın humanizmi məhz belə məqamlarda özünü göstərir! O, insanı statistik göstəricinin arxasında görünməz edən yanaşmadan deyil, insanın taleyini, əməyini və ehtiyaclarını önə çəkən sosial baxışdan çıxış edir.Əlbətdə ki, bu gün Tibb işçilərinin maaşlarının artırılması təşəbbüsünü də bu baxımdan iqtisadi qərar və ölkəmizdə insana verilən dəyərin ifadəsi kimi qiymətləndirirəm. Səhiyyə sisteminin inkişafına gəlincə, məhz bu məsələ yeni xəstəxanaların tikilməsi, müasir tibbi avadanlıqların alınması və texnologiyaların tətbiqi ilə məhdudlaşmır. Ən müasir avadanlığı idarə edən, xəstəyə diaqnoz qoyan, müalicə aparan və ən çətin anda insan həyatına ümid olan məhz tibb işçisidir. Buna görə də səhiyyəyə qoyulan ən mühüm investisiyalardan biri insan kapitalına qoyulan investisiyadır. Əminliklə vurğulayıram ki, bu gün Tibb işçilərinin əməyinin layiqincə qiymətləndirilməsi onların sosial müdafiəsini gücləndirməklə yanaşı, peşəyə olan motivasiyanı da artırır. Bir məqamda vurğulayım ona görə ki, mən bu məqamın canlı şahidiyəm, bu addımın regionlar üçün də xüsusi əhəmiyyəti var. Əməkhaqlarının yüksəldilməsi ixtisaslı mütəxəssislərin bölgələrdə fəaliyyətə marağını artıracaq, səhiyyə xidmətlərinin keyfiyyətinin yüksəlməsinə və tibbi xidmətlərin daha əlçatan edəcəkdir.Bu isə nəticə etibarilə birbaşa vətəndaşın rifahını yüksəldəcəkdir. Mənim üçün bu məsələnin başqa bir mühüm tərəfi də var. Azərbaycanda Birinci vitse-prezidentlik institutu təsis edilərkən, hələ həmin vəzifənin ölkəmizdə yeni siyasi idarəçilik institutu kimi formalaşdığı ilk mərhələdə mən öz mövqeyimi açıq şəkildə ifadə etmiş və bu vəzifəyə Birinci xanım Mehriban Əliyevanın alternativsiz namizəd olduğunu bildirmişdim.Bu fikrin əsasında onun yüksək siyasi potensialı və uzun illər ərzində xalqımıza göstərdiyi xidmət, humanitar fəaliyyəti, insanlara münasibəti və dövlətçilik dəyərlərinə sədaqəti dayanırdı.Bu gün zaman göstərir ki, həmin seçim Azərbaycan dövlətçiliyinin inkişafında mühüm siyasi və sosial məna daşıyan qərarlardan biri olub. Mehriban Əliyevanın Birinci vitse-prezident kimi fəaliyyəti dövlət idarəçiliyində insan amilinin, sosial məsuliyyətin və humanist yanaşmanın daha da güclənməsinə xidmət edir. Əməkhaqlarının artırılması ilə bağlı son təşəbbüs də bunun növbəti nümunəsidir! Qeyd edim ki, burada söhbət sadəcə maaş artımından getmir. Söhbət, Azərbaycan dövlətinin öz həkiminə, tibb bacısına, səhiyyə əməkdaşına verdiyi dəyərdən gedir. Söhbət hər gün insan həyatını qoruyan insanların özlərinin də dövlət qayğısı ilə əhatə olunmasından gedir. Prezident İlham Əliyevin rəhbərliyi ilə həyata keçirilən sosial siyasətin əsas mahiyyəti də məhz budur, dövlətin gücü yalnız iqtisadi göstəricilərlə deyil, vətəndaşına, onun əməyinə və rifahına münasibəti ilə ölçülür. Mehriban Əliyevanın təşəbbüsü və Prezident İlham Əliyevin bu təşəbbüsü dəstəkləyərək icrasına tapşırıq verməsi isə həmin siyasətin səhiyyə sahəsində konkret və real təzahürüdür. Bu qərar onu göstərir ki, güclü dövlət güclü səhiyyə infrastrukturu yaradır, həmin sistemi yaşadan insanın əməyini də yüksək qiymətləndirir. Tibb işçilərinin əməkhaqlarının artırılması həm sosial ədalətin, həm dövlət qayğısının, həm də Mehriban xanım Əliyevanın humanizm və insanpərvərlik prinsiplərinə əsaslanan fəaliyyətinin təzahürüdür. Əslində, böyük ürəyə sahib olmaq insanlara xoş söz söyləməklə yanaşı, onların ehtiyaclarını görmək, əməyini qiymətləndirmək və problemlərinin həllinə real dəstək verməklə ölçülür. Mehriban xanım Əliyevanın bu təşəbbüsü də məhz belə bir humanist yanaşmanın, insanı dövlət siyasətinin mərkəzində görən düşüncənin parlaq nümunəsidir. Sonda bir daha xüsusi vurğulamaq lazımdır ki, Birinci vitse-prezident Mehriban Əliyevanın təşəbbüsü ilə tibb işçilərinin maaşlarının artırılması, dövlətin səhiyyə sahəsinə göstərdiyi yüksək diqqət və qayğının, insan amilinə verilən dəyərin bariz ifadəsidir.

YAP Saatlı rayonu 15 saylı ƏPT-n sədri, UNEC-n məzunu Vüqar Məmmədov