XALQIN ETİMADINI QAZANMAQ ÜÇÜN ONUN DƏRDİNİ DİNLƏMƏK LAZIMDIR
Millət vəkili olmaq yalnız parlament kürsüsündə əyləşmək, qanun layihələrini müzakirə etmək və seçicilər qarşısında vədlər vermək demək deyil. Deputat olmaq, ilk növbədə, xalqın etimadını doğrultmaq, insanların qayğılarını özünə dərd bilmək, onların səsini aidiyyəti qurumlara çatdırmaq məsuliyyətidir.
Unutmaq olmaz ki, deputata verilən mandat şəxsi nüfuz və imtiyaz üçün deyil, xalqın maraqlarını müdafiə etmək üçündür. Seçici səsini verərkən yalnız bir şəxsi deyil, öz ümidlərini, problemlərinin həlli arzusunu və gələcəyə olan inamını da ona etibar edir.
Bu gün cəmiyyətin müxtəlif təbəqələrinin diqqət gözləyən problemləri var. Sosial çətinliklər yaşayan ailələr, iş axtaran gənclər, mənzil problemi ilə üzləşən vətəndaşlar, şəhid ailələri, qazilər, aztəminatlı insanlar və digər həssas qruplar diqqətdən kənarda qalmamalıdır.
Millət vəkilinin fəaliyyəti yalnız seçki ərəfəsində deyil, seçkidən sonra da görünməlidir. İnsanların qapısını döymək, müraciətlərini dinləmək, problemlərinin həlli üçün müvafiq dövlət qurumları qarşısında məsələ qaldırmaq əsl deputat məsuliyyətinin göstəricisidir.
Naqif Həmzəyev kimi ictimaiyyətin diqqətində olan millət vəkillərinin fəaliyyəti də məhz bu məsuliyyət meyarları ilə dəyərləndirilməlidir. Eyni zamanda, bütün deputatların fəaliyyətinə yanaşarkən əsas ölçü şəxsi münasibətlər deyil, xalqın mənafeyi, görülən işlər və əldə olunan nəticələr olmalıdır.
Əlbəttə, hər bir deputatın fəaliyyətini obyektiv qiymətləndirmək üçün onun seçicilərlə ünsiyyəti, qaldırdığı məsələlər və bu məsələlərin həllinə verdiyi töhfə nəzərə alınmalıdır.
Bir həqiqət var: xalqın dərdini dinləməyən, onun səsinə qulaq asmayan, seçicisinin üzləşdiyi çətinliklərə biganə qalan insan təmsilçilik missiyasının mənasını itirər.
Deputat xalqdan uzaqlaşmamalıdır. Çünki xalqın səsi parlamentdə eşidilmirsə, onun etimadını doğrultmaq da çətinləşir.
Vəzifə müvəqqətidir, xalqın yaddaşı isə qalıcıdır. Xalq üçün çalışan insanın adı hörmətlə çəkilər, xalqın dərdinə biganə qalan isə verdiyi vədlərlə deyil, yerinə yetirmədiyi vəzifələrlə xatırlanar.
Unutmayaq: deputat xalqın üstündə deyil, xalqın xidmətində olmalıdır!
AYNURƏ ULDUZ TEYMUROVA
“QIZIL QƏLƏM” MEDIA MÜKAFATI LAUREATI
ATA-TV az, AZAD- TVaz baş redaktoru birinci birinci müavini