17 Noyabr Azərbaycan xalqının milli azadlıq mübarizəsi tarixində mühüm yer tutan şərəfli gündür. Milli iradənin, birlik və azadlıq istəyinin təcəssümü olan əlamətdar gün!
1988-ci il noyabrın 17-də Bakının indiki Azadlıq meydanında başlayan kütləvi xalq mitinqləri Azərbaycanın milli azadlıq hərəkatının geniş vüsət almasına təkan verdi. Xalqın birliyi, əzmi və mübarizəsi həmin mitinqlərdə özünü göstərirdi. Həmin dövrdə xalqı meydanlara gətirən əsas səbəblərdən biri Ermənistanın Azərbaycana qarşı ərazi iddiaları, Qarabağ ətrafında baş verən hadisələr, milli hüquqların pozulması və sovet hakimiyyətinin ədalətsiz siyasəti idi. Xalq bütün bu haqsızlıqlara qarşı sinəsini meydanda sipər etdi, odlu-alovlu çıxış və etirazları ilə öz sərt mövqeyini göstərdi.
Meydana toplaşan insanlar təkcə etiraz səslərini ucaltmır, həm də milli kimliyinə, torpağına, tarixinə və gələcəyinə sahib çıxmaq iradəsini nümayiş etdirirdilər. Bu, qorxu səddini aşan, xalqın öz taleyini özü müəyyənləşdirmək istəyini ortaya qoyan tarixi dirəniş idi. Bu Azərbaycan xalqının tarixi dirənişi, tarixi mübarizəsi idi.
Həmin günlərdə meydanlarda yüksələn azadlıq çağırışları milli özünüdərkin güclənməsinə, müstəqillik ideyasının xalqın əsas amalına çevrilməsinə səbəb oldu. Bu mübarizə sonradan Azərbaycanın dövlət müstəqilliyinin bərpasına aparan yolun mühüm mərhələsinə çevrildi.
17 Noyabr bizə xatırladır ki, xalqın birliyi, milli iradəsi və azadlıq əzmi heç bir qüvvə qarşısında əyilməməlidir. Çünki dirçəliş yalnız tarixdə baş verən hadisə deyil, həm də hər bir nəslin qoruyub yaşatmalı olduğu milli ruhdur.
Bu gün Milli Dirçəliş Günü xalqımızın azadlıq əzminə, müstəqillik uğrunda mübarizə aparan insanların cəsarətinə və dövlətçilik tariximizə ehtiram günüdür. O xalq ki, yolunu Azadlıq meydanlarından, ən çətin dövrlərdə belə etiraz etmək hüququndan, özünüifadə hüququndan və Azadlıq tələbindən qorxmayıb.
1988-ci il dekabrın 4-dən 5-nə keçən gecə sovet qoşunları mitinqi zor gücünə dağıtsa da, xalqın azadlıq iradəsini susdurmaq mümkün olmadı. Bu mümkün deyildi. Çünki o tarixi onlar yaza bildi və başına gətirilən bütün müsibətlər hesabına olsa belə susdurmaq olmadı.
Odur ki, 17 Noyabr tarixi gün kimi 1992-ci ildən Milli Dirçəliş Günü kimi qeyd olunur.
Gününüz mübarək! Azadlığımız və hüquqlarımız naminə mübarizəmizdən əl çəkməməli, xalqın əzmi özünü daim göstərməlidir!
Günel Sabirqızı
Atatv.az, Azadtv.az saytlarının və İctimai Xəbər Agentliyinin xüsusi müxbiri