Cəmiyyətin inkişafı yalnız iqtisadi göstəricilərlə deyil, həm də milli-mənəvi dəyərlərə, sosial həmrəyliyə, şəhid ailələrinə, qazilərə və müharibə iştirakçılarına göstərilən diqqət və qayğı ilə ölçülür. Bu baxımdan “Regional Əməkdaşlıq Sosial İnkişaf” İctimai Birliyinin fəaliyyəti, həyata keçirdiyi layihələr və ictimai təşəbbüsləri xüsusi əhəmiyyət daşıyır.
Yarandığı gündən etibarən sosial inkişaf, regional əməkdaşlıq, vətənpərvərlik və milli-mənəvi dəyərlərin təbliğini əsas fəaliyyət istiqamətlərindən biri seçən təşkilat cəmiyyətdə birlik və həmrəylik ruhunun gücləndirilməsinə öz töhfəsini verir. Şəhid ailələrinə, qazilərə və Vətən müharibəsi iştirakçılarına göstərilən diqqət, onların qəhrəmanlığının təbliği və gənc nəslin vətənpərvərlik ruhunda yetişdirilməsi təşkilatın fəaliyyətində mühüm yer tutur.

Təşkilatın layihə təklifləri sırasında “Vətən müharibəsi – Zəfər tariximiz” və onun yaratdığı yeni reallıqlar mövzusunda tədbirlərin keçirilməsi xüsusi yer tutur.
Azərbaycan Prezidenti, Ali Baş Komandan, şanlı ordumuz və müzəffər xalqımız Zəfər Gününü qürur hissi ilə qeyd etməklə yanaşı, sülhün və əmin-amanlığın təmin olunması üçün dünyaya çağırışlar edir, millətləri və xalqları həmrəyliyə səsləyir.
44 günlük müharibə və əldə olunan tarixi Qələbə ölkə Prezidentinin siyasətini, qətiyyətini nümayiş etdirməklə yanaşı, çətin gündə xalqımızın birliyini və əyilməzliyini də ortaya qoydu. Şanlı ordumuz Azərbaycanın hərb tarixinə şanlı səhifə yazmaq bacarığına malik olduğunu sübuta yetirdi.
Bu tarixi Qələbənin əldə olunmasında Azərbaycan Respublikasının Prezidenti, Ali Baş Komandan cənab İlham Əliyevin siyasi iradəsi, qətiyyəti, uzaqgörən strategiyası və prinsipial mövqeyi mühüm rol oynadı.

44 günlük müharibə ölkəmiz üçün yalnız hərbi sınaq deyil, həm də böyük siyasi, diplomatik və mənəvi mübarizə dövrü idi. Müharibənin ən ağır günlərində ölkə başçısı həm hərbi-siyasi proseslərə rəhbərlik edir, həm də beynəlxalq informasiya və diplomatiya cəbhəsində Azərbaycanın haqq səsini dünyaya çatdırırdı. Gecə-gündüz davam edən gərgin fəaliyyət, yorulmaz diplomatik mübarizə, qətiyyətli mövqe və əzmkarlıq xalqımızın yaddaşında silinməz iz buraxdı.

Azərbaycan uzun illər təcavüzkarların əməlləri nəticəsində torpaqlarının işğal altında qalmasına dözdü. Danışıqlara, sülhə ümid bəslədi, təşəbbüslərə və çağırışlara inandı. Lakin problemin danışıqlar yolu ilə həll olunmasına göstərilən cəhdlər nəticə vermədi. Beynəlxalq təşkilatların qətnamələri, qərarları, böyük dövlətlərin vədləri və uzunmüddətli danışıqlar öz nəticəsini vermədi. Azərbaycan dövləti BMT-nin qətnamələrinin icrasını təmin etmək məcburiyyətində qaldı.
Ölkə iqtisadiyyatı inkişaf etdirildi, ordu quruculuğu möhkəmləndirildi, hərbi peşəkarlıq gücləndirildi. Güclü və qüdrətli ordu yaradıldı. Silahlı qüvvələrin təchizatına, modernləşdirilməsinə, hərbi vətənpərvərlik tərbiyəsinin yüksəldilməsinə böyük qayğı və diqqət göstərilməsi nəticəsində məhz bu misilsiz tarixi Qələbə əbədiyyətə qədər yaddaşlara, tarixə qızıl hərflərlə yazıldı.

Ali Baş Komandan İlham Əliyevin rəhbərliyi ilə qazanılan şanlı Qələbə torpaqlarımızın işğaldan azad edilməsi baxımından dövlətçilik tarixində xüsusi əhəmiyyət kəsb edir. Hər bir Azərbaycan vətəndaşı bu tarixi, şərəfli məqamların şahidi olmaqdan, qurucu və qürurverici tarixi günləri yaşamaqdan xoşbəxt olduğunu dilə gətirir.
Bu gün Qarabağda və Şərqi Zəngəzurda aparılan genişmiqyaslı bərpa-quruculuq işləri, doğma yurdlarına qayıdan keçmiş məcburi köçkünlərimizin yeni həyata başlaması dövlətimizin gücünün və xalqımızın iradəsinin təzahürüdür. Uzun illər davam edən yurd həsrəti, doğma torpaqlara qayıdış arzusu böyük Zəfərlə gerçəyə çevrildi. Artıq işğaldan azad edilmiş torpaqlarımızda inkişaf, quruculuq və dirçəliş prosesi davam edir.

Ermənilərin uzun illər davam edən işğalçılıq siyasəti, insanların başına gətirilən min bir müsibət, kütləvi qırğınlar, soyqırımlar və törədilən təxribatlar unudulmamalıdır. Hər bir azərbaycanlı qan yaddaşımızı xatırlamalı, Azərbaycan tarixinə qızıl hərflərlə yazılan Zəfərimizin tarixini bilməlidir.
Ölkəmizin inkişafında, Azərbaycan həqiqətlərinin təbliğində gənclərin rolu yüksəkdir. Qururverici haldır ki, bu günün gəncləri bilik və bacarıqlarını Azərbaycanın dövlət müstəqilliyinin möhkəmlənməsinə, beynəlxalq aləmdə layiqli yer tutmasına və demokratik dövlət quruculuğuna yönəldirlər. Bu istiqamətdə məktəblərin və gənclərin vətənpərvərlik ruhunda tərbiyə edilməsi, onlara milli-mənəvi dəyərlərin aşılanması olduqca əhəmiyyətlidir. Məhz bu amillər layihənin aktuallığını təşkil edir.

Zəfər tariximizi yaşatmaq gələcək nəsillər qarşısında mənəvi borcumuzdur
“Regional Əməkdaşlıq Sosial İnkişaf” İctimai Birliyinin həyata keçirdiyi layihələrin əsas məqsədi Azərbaycan həqiqətlərinin, 44 günlük Vətən müharibəsi dövrünün və Zəfər tariximizin təbliği istiqamətində tədbirlər keçirmək, gənclər arasında təbliğat-maarifləndirmə işlərini genişləndirməkdir.
Layihə çərçivəsində Qusar, Quba, Xaçmaz, Şabran və Şamaxı rayonlarında şəhid ailələri və iştirakçılarla görüşlərin təşkili nəzərdə tutulub. Məktəblilərlə və gənclərlə mədəni-maarifləndirici tədbirlərin keçirilməsi, Azərbaycanın tarixi Zəfərinin, milli-mənəvi dəyərlərinin və vətənpərvərlik hissinin aşılanması əsas məqsədlərdəndir.
Birliyin fəaliyyəti yalnız layihə sənədlərində nəzərdə tutulan tədbirlərlə məhdudlaşmır. 2022-ci ildən etibarən bu istiqamətdə həyata keçirdiyimiz layihələr çərçivəsində müxtəlif bölgələrdə görüşlər, maarifləndirici tədbirlər və vətənpərvərlik ruhlu proqramlar təşkil olunub.

Qax, Şəki, Oğuz və Zaqatala rayonlarında şəhid ailələri, məktəblilər, qazilər, müharibə iştirakçıları və ictimaiyyət nümayəndələri ilə görüşlər keçirilib.
Bu görüşlər zamanı 44 günlük Vətən müharibəsinin qəhrəmanlıq salnaməsi, şəhidlərimizin şücaəti, qazilərimizin fədakarlığı və Azərbaycan Ordusunun tarixi missiyası haqqında söhbətlər aparılıb. Məqsədimiz gənc nəslə Vətənin hansı çətinliklər və qurbanlar bahasına azad edildiyini anlatmaq, onların qəlbində dövlətə, bayrağa və torpağa sədaqət hissini gücləndirməkdir.
Bu gün hər bir azərbaycanlı bilməlidir ki, torpaqlarımızın azadlığı şəhidlərimizin canı, qazilərimizin sağlamlığı, igid əsgər və zabitlərimizin qəhrəmanlığı bahasına əldə olunub. Bu böyük Qələbənin arxasında xalqımızın sarsılmaz birliyi dayanır.

Şəhid analarının qarşısında baş əyirik. Onların böyüdüb boya-başa çatdırdıqları qəhrəman övladlar Vətən uğrunda canlarından keçərək tarix yazdılar. Şəhid ailələrinin yanında olmaq, onların dərdlərinə şərik olmaq, qəhrəman övladlarının xatirəsini yaşatmaq bizim üçün xüsusi mənəvi məsuliyyətdir. Qazilərimizə ehtiram göstərmək, onların fədakarlığını cəmiyyətə çatdırmaq da fəaliyyətimizin əsas istiqamətlərindəndir.
Hər il 8 Noyabr – Zəfər Günü ərəfəsində bu ənənəni davam etdirir, şəhid ailələri və qazilərimizlə görüşlər təşkil edir, xalqımızın tarixi Qələbəsini birlikdə qeyd edirik. Bu bayram bizim üçün sadəcə təqvim günü deyil, milli qürurumuzun, birliyimizin, şəhidlərimizə minnətdarlığımızın və qəhrəmanlarımıza ehtiramımızın ifadəsidir.
Layihənin əsas ideyası Azərbaycan həqiqətlərini təbliğ etmək, ölkəmizin haqq mübarizəsi nəticəsində əldə etdiyi tarixi Qələbəni əbədi yaddaşlara həkk etmək, gəncləri milli ruhda yetişdirmək və gələcək nəsillərə Zəfər salnaməmizi olduğu kimi çatdırmaqdır.

İnanırıq ki, tarixini unutmayan, qəhrəmanlarına sahib çıxan və milli birliyini qoruyan xalqın gələcəyi daim möhkəm olacaq. Bu səbəbdən də gənc nəslə Vətən sevgisini aşılamaq, onları tariximizdən xəbərdar etmək, dövlətçilik ənənələrinə hörmət ruhunda yetişdirmək hər birimizin məsuliyyətidir.
“Regional Əməkdaşlıq Sosial İnkişaf” İctimai Birliyi olaraq bundan sonra da sosial inkişaf, regional əməkdaşlıq, vətənpərvərlik və milli-mənəvi dəyərlərin təbliği istiqamətində fəaliyyətimizi davam etdirmək, yeni layihələr həyata keçirmək və Zəfər tariximizin gələcək nəsillərə çatdırılmasına töhfə vermək niyyətindəyik.

Bu müqəddəs yolda Azərbaycan Respublikasının Prezidenti, Ali Baş Komandan cənab İlham Əliyevə, rəşadətli Azərbaycan Ordusuna, Vətən uğrunda canından keçən şəhidlərimizə, qazilərimizə, şəhid ailələrinə və bütün xalqımıza dərin ehtiram və minnətdarlığımızı bildiririk.

Qoy üçrəngli bayrağımız daim yüksəklərdə dalğalansın! Şəhidlərimizin əziz xatirəsi qəlbimizdə əbədi yaşasın, Zəfər tariximiz gələcək nəsillərə örnək olsun!

Hər birinizi 8 Noyabr – Zəfər Günü münasibətilə ürəkdən təbrik edirəm!

Məmmədova Bahar İctimai Xəbər Agentliyinin İcraçı Direktoru , “Regional Əməkdaşlıq Sosial İnkişaf” İctimai Birliyinin sədri