Hər il noyabrın 10-u təqvim yarpaqlarının sadəcə bir tarixi deyil, həm də bəşər tarixində zamanın ixtiyari olaraq dayandığı, milyonlarla insanın eyni anda nəfəsini tutub keçmişə hesabat verdiyi vicdan anıdır. Saat 09:05... Bu sadə rəqəm birləşməsi deyil; bu, bir xalqın öz tarixini yazan, məhv olmaq üzrə olan bir imperiyanın xarabalıqlarından müasir, qürurlu bir respublika dirçəldən dahi memarına sədaqət rəmzidir. Mustafa Kamal Atatürkün fiziki olaraq aramızdan ayrıldığı an, əslində, onun ideyalarının, prinsiplərinin və ölməzliyinin başlanğıc nöqtəsidir.

Tarix boyu imperiyalar yıxılıb, padşahlar, sərkərdələr gəlib-gedib. Onların bir çoxu qılınc gücü ilə torpaqlar fəth edib, adlarını qızıl hərflərlə salnamələrə yazdırıblar. Lakin çox az lider xalqının ruhunu, düşüncəsini, gələcəyə baxışını kökündən dəyişməyə nail olub. Atatürkü əbədiyyətə qovuşdıran və onu ölməzlik düsturunun sahibinə çevirən məhz onun xalqı ilə qurduğu qırılmaz, sarsılmaz vəhdət idi. O, heç vaxt özünü xalqdan üstün tutmadı; "Mən bir gəmi kaptanıyamsa, siz də bu gəminin xilaskarlarısınız" deyərək hər bir vətəndaşı azadlıq mübarizəsinin əsas qəhrəmanına çevirdi.

Dağılmış, yorulmuş, səfalət içində olan bir millətə "Sən kimsən?" sualını yenidən xatırladan və ona milli kimliyini qaytaran məhz Mustafa Kamal oldu. O, qaranlıqdan qorxanlara elmi, cəhalətə boyun əyənlərə azad düşüncəni, ümidsizlərə isə qələbə əzmini aşılaya bildi. Çünki o, xalqının ürəyini oxuya bilirdi; xalqın nə istədiyini deyil, xalqın nəyə ehtiyacı olduğunu görürdü. Qurtuluş Savaşının hər qarışında, Çanaqqalanın səngərlərində, Sakaryanın qanlı düzlərində türk əsgərinin gözündəki inamla Atatürkün baxışındakı qətiyyət eyni nöqtədə – Vətən sevgisində birləşirdi.

"Mənim naciz vücudum əlbət bir gün torpaq olacaq, lakin Türkiyə Cümhuriyyəti ilə əbədi yaşayacaqdır" – bu sözlər sadəcə siyasi vəsiyyət deyil, həm də əsl liderin xalqına etdiyi sonsuz etimadın təzahürü idi. Atatürk bilirdi ki, fiziki bədən ömürlüdür, lakin azadlıq eşqi ilə döyünən ürək və maariflə ışıqlanan beyin ölməzdir. O, öz ölməzliyini mərmər abidələrdə deyil, milyonların qəlbində, uşaqların gözlərilə gələcəyə baxan Cümhuriyyətin təməllərində qurdu.

Bu gün 10 noyabra baxanda biz təkcə yas tutmuruq; biz tarixi dəyişən o böyük iradənin qarşısında baş əyirik. Xalqla Atatürk vəhdəti yalnız keçmişin xatirəsi deyil, Türkiyəmiz və Türk dünyası üçün bu günümüzün güvəni, sabahımızın ən etibarlı kompasıdır. Çünki Mustafa Kamal Atatürk sübut etdi ki, ürəyi xalqı ilə bir döyünən lider heç vaxt ölmür.

Çünki ölməzliyin düsturu torpağa qarışmaq deyil, xalqının yaddaşında və gələcəyində əbədi yaşamaqdır. İşıqlı yolunla, dəyişdiyin tarixlə və xalqının sarsılmaz sevgisi ilə hər zaman qalbimizdəsən, Ata!

Yeganə Qəhrəmanova
ADPU-nun dosenti, filologiya üzrə fəlsəfə doktoru,
Azərbaycan-Türk Xalqları Qardaşlığı İctimai Birliyinin həmsədri,
İctimai Xəbər Agentliyi və ATA TV-nin direktoru